Farmasevtikada boshqaruv fanidan o‘quv-uslubiy majmua

Auditorlik tashkiloti – auditorlik faoliyatini amalga oshirish uchun litsenziyaga ega bo‘lgan yuridik shaxs. Auditorlik tashkilotlari vazirliklar, davlat qo‘mitalari, idoralar hamda boshqa davlat va xo‘jalik boshqaruvi idoralari tomonidan tashkil etilishi mumkin emas. Auditorlik tashkilotlari o‘z faoliyatini mustaqil ravishda tashkil etadi. Auditorlik tashkilotlari quyidagi majburiy shartlarga rioya qilgan holda qonunchilik bilan ko‘zda tutilgan istalgan tashkiliy-huquqiy shaklda tashkil etilishi va o‘z faoliyatini amalga oshirishi mumkin, ochiq aksiyadorlik jamiyatlari bundan istisno:

• 
  auditorlik tashkiloti ustav kapitalining kamida 51 foizi bir yoki bir nechta auditorga tegishli bo‘lishi lozim (auditorlik tashkilotini – horijiy auditorlik tashkilotining filiali yoki sho‘ba korxonasini tashkil etish hollaridan tashqari);
  
• 
  auditorlik tashkiloti xodimlarining soni kamida ikki auditordan tarkib topishi lozim;
  
• 
  auditorlik tashkilotining rahbari faqat auditor bo‘lishi kerak;
  
• 
  auditorlik tashkilotining qonunchilik bilan ko‘zda tutilgan ustav kapitalini bo‘lishi.
  

Auditorlik tashkilotlari O‘zbekiston Respublikasi Adliya vazirligida davlat ro‘yxatidan o‘tgan bo‘lishi lozim. Adliya vazirligi auditorlik tashkilotlarining davlat reestrini olib boradi. Auditorlik tashkilotlarining davlat ro‘yxatidan o‘tish va auditorlik tashkilotlarining davlat reestrini olib borish tartibi qonunchilik bilan belgilab beriladi.
Auditorlik tashkilotlari auditorli­k faoliyatini, o‘z fuqarolik javobgarligini sug‘urta qilish polisi mavjud bo‘lishi sharti bilan, auditorlik xizmatlarini ko‘rsatish haqida tuzilgan shartnomaga asosan amalga oshiradilar.
Auditorlik tashkilotining huquqlari
Auditorlik tashkiloti quyidagi huquqlarga ega bo‘ladi:

• 
  auditorlik tekshiruvini o‘tkazish to‘g‘risidan qaror qabul qilish uchun xo‘jalik yurituvchi sub’ektning ta’sis hujjatlari hamda buxgalteriya hisobi va moliyaviy hisobot hujjatlari bilan oldindan tanishib chiqish;
  

• 
  auditorlik tekshiruvini o‘tkazish vaqtida: xo‘jalik yurituvchi sub’ekt tomonidan moliyaviy-xo‘jalik faoliyatini amalga oshirish bilan bog‘liq bo‘lgan hujjatlarini to‘la hajmda olish, hamda ushbu hujjatlarda hisobga olingan har qanday mulkning amalda mavjudligini va har qanday majburiyatlarning amaldagi holatini tekshirish;
  
• 
  xo‘jalik yurituvchi sub’ektning moddiy javobgar shaxslaridan auditorlik tekshiruvi davomida paydo bo‘lgan savollar bo‘yicha auditorlik tekshiruvi uchun kerakli bo‘lgan og‘zaki va yozma tushuntirishlar, qo‘shimcha ma’lumotlar olish;
  
• 
  xo‘jalik yurituvchi sub’ektdan uchinchi shaxslardan olingan ma’lumotlarning yozma tasdig‘ini olish;
  
• 
  xo‘jalik yurituvchi sub’ekt tomonidan haqqoniy auditorlik xulosasini tuzish uchun kerakli barcha ma’lumotlar taqdim etilmagan hollarda, auditorlik tekshiruvini o‘tkazishdan bosh tortish;
  
• 
  auditorlik tekshiruvini o‘tkazishda qatnashish uchun o‘rnatilgan tartibda auditorlar va boshqa mutaxassislarni jalb qilish.
  

Auditorlik tashkiloti qonunchilikka muvofiq boshqa huquqlarga ham ega bo‘lishi mumkin.