Farmasevtikada boshqaruv fanidan o‘quv-uslubiy majmua

Tashkilotning maqsadi — bu belgilangan vaqt davomida barcha hodimlarning muvofiqlashtirilgan xatti-harakatlari yordamida erishish mumkin bo‘lgan istalgan holat yoki natija.
Maqsadlarni ifodalash ularning xususiyatlarini va ularga qo‘yiladigan talablarni aniq tushunilishini taqozo etadi.
Boshqaruv maqsadi quyidagi talablarga javob berishi kerak:

• 
  aniqlik (aniq ifodalangan yakuniy natija);
  
• 
  mantiqiyligi (mazmuni bo‘yicha bir ma’noni anglatishi, qarama-qarshi talqinlarning istisno etilishi);
  
• 
  erishish imkoniyati (bajarilishi mumkin bo‘lishi kerak);
  
• 
  miqdoriy jihatdan o‘lchanishi;
  
• 
  vaqt bo‘yicha belgilanganligi (bajarish muddatlari)
  
• 
  maqsad barcha bajaruvchilarga tushunarli bo‘lmog‘i darkor;
  
• 
  maqsadni amalga oshirish bo‘yicha xatti-xarakatlar bo‘limlar va ma’sullar bo‘yicha taqsimlanganbo‘lishi lozim;
  
• 
  samaradorlik (natija va foyda berishi).
  

Tashkilotning boshqaruv maqsadlarini turli mezonlar bo‘yicha tasniflash mumkin, ularning ichida vaqt davri, takrorlanish va ustuvorlik mezonlari yetakchilik qiladi.
Vaqt davriga qarab maqsadlar strategik (5—10 yillik davri uchun), taktik (5 yilgacha), tezkor (operativ) maqsadlarga ajratiladi.
Ustuvorlik darajasi bo‘yicha maqsadlar zudlik bilan amalga oshiriladigan va nomuhim maqsadlarga toifalanadi.
Takrorlanishi bo‘yicha esa — doimiy, davriy takrorlanadigan va fursatli maqsdlarga bo‘linadi. Doimiy va davriy takrorlanadigan maqsadlar uchun, odatda, standart axborotlardan foydalangan holda, ya’ni rasmiy yondashuv ishlab chiqiladi. Fursatli maqsadlarga erishish uchun yangi uslublar yaratiladi, mutaxassislar o‘qitiladi, yangi resurslar izlab topiladi.
Doimiy (uzluksiz) va davriy takrorlanadigan maqsadlar – muntazam ravishda belgilanadigan va amalga oshiriladigan maqsadlar. Masalan, mehnat unumdorligini oshirish, intizomni mustaxkamlash, mahsulot sifatini oshirish, tannarxni pasaytirish kabi uzluksiz ravishda belgilanadigan maqsadlar.