Фанидан таянч конспект ғ. Б. Эрназаров

Иқтисодиётни диверсификациялаш жараёнларини жадаллаштиришни молиялаштириш манбалари

Амалга оширилган кенг кўламли чора-тадбирлар натижасида, 2001 йилда кичик бизнес ва хусусий тадбиркорликни ривожлантириш учун 171,5 миллиард сўм кредит ажратилган бўлса, 2013 йилда бу кўрсаткич 6982,0 миллиард сўмни ташкил этди. Кичик бизнес ва хусусий тадбиркорлик соҳасига йўналтирилган кредитлар миқдори 2001-2013 йиллар мобайнида деярли 41 мартага ўсган.
«Кичик бизнес ва хусусий тадбиркорлик субъектларининг экспортини қўллаб-қувватлаш жамғармаси» томонидан фаолияти давомида 153 та тадбиркорлик субъектига умумий қиймати 56 млн. доллардан зиёд бўлган экспорт шартномаларини тузишда амалий ёрдам кўрсатилди.Жумладан, 2013 йилда жамғарма ёрдамида «Зартола текстиль» МЧЖ ҚК ва Dae Yong Licoris МЧЖ ҚК 66,1 минг АҚШ долл. миқдорида экспорт шартномалари туздилар. Бундан ташқари, Жамғарма томонидан «Асклепий-свифт» МЧЖ ҚКга 150 млн. сўм миқдоридаги молиявий ёрдам ҳамда хорижий ҳамкорларни топишда ёрдам кўрсатилди. Ушбу ёрдам асосида корхона умумий қиймати 1 млн. долл. ортиқ бўлган иккита экспорт шартномаси тузишга муваффақ бўлди.
Мамлакатимизда ишлаб чиқарилаётган маҳсулотларни экспорт қилиш учун ташқи бозорларда чуқур маркетинг тадқиқотларини ўтказиш ҳамда потенциал имкониятларни аниқлаш борасида ижобий натижалар қўлга киритилди. Таҳлилнинг кўрсатишича, бугунги кунда ўзбек тадбиркорлари тақдим этиши мумкин бўлган 16 турдаги товарлар ва 15 турдаги хизматлар бўйича 173 дан ортиқ мамлакатларда эҳтиёжлар мавжуд экан.
Ўтган даврда жамғарма 14,3 мингдан ортиқ кичик бизнес ва хусусий тадбиркорлик корхоналари томонидан ишлаб чиқарилаётган товарлар ассортименти ва номенклатурасини тизимли таҳлил қилиб чиқди, уларнинг ташқи бозорлардаги рақобатбардошлик даражасини аниқлади, маълумотлар базасини шакллантирди, ишлаб чиқарилаётган маҳсулотнинг жаҳон ва минтақавий бозорлардаги талабга мувофиқлигини таъминлаш бўйича таклифлар ишлаб чиқди. Олинган натижалардан келиб чиққан ҳолда 2014 йилда 1,6 мингдан ортиқ корхоналар ўз маҳсулотларини экспортга жўнатиш имконига эга бўлишган.