Fan tarixi

Xorazm Ma'mun Akademiyasining qayta tiklanishi.
“Qadim Xorazm diyorida azaldan ilmu-fan, san'at va hunar ravnaq topib, gullab yashnagan. Ma'mun akademiyasi ham aynan ana shu yerda vujudga kelganini doimo faxru-g'urur bilan eslaymiz. Bu o'lkada yetishib chiqqan Muhammad al-Xorazmiy, Abu Rayhon Beruniydek daho ajdodlarimiz jahon sivilizasiyasiga beqiyos hissa qo'shib, aql-zakovati, salohiyati bilan elu-yurtimizning, xalqimizning nomini olamga tarannum etdilar. Ko'p asrlik tarix va bebaho madaniyatga ega, qanchadan-qancha buyuk zotlarga ta'lim va tarbiya bergan Xiva shahri butun dunyoga ma'lum va mashhur tabarruk maskandir”, - deyiladi O'zbekiston Respublikasi Prezidenti Islom Karimovning Xiva shahri 2500 yilligini nishonlashga bag'ishlangan so'zlarida.

Markaziy Osiyo xalqlari va davlatlari qadimgi tarixga ega. Ko'rilayotgan davrda Markaziy Osiyo Sug'd, Xorazm, Farg'ona, Shosh, Usrushana, Chag'oniyon, Xuttalon kabi o'lkalardan iborat bo'lib, G'arb bilan Sharq mamlakatlarini bog'lovchi “Ipak yo'li” markazida joylashgan va madaniy jihatdan ancha rivojlangan mintaqani tashkil etar edi.

Mustaqilligimiz sharofati Prezidentimizning maxsus qarori bilan qaytadan tashkil qilingan Ma'mun Akademiyasi Respublika ilm ahli, ayniqsa, xorazmliklar uchun keng imkoniyatlar yaratdi. Shuningdek, O'zbekistonning ilmiy salohiyatini yuksaltirish, uni jahon ilmiy hamjamiyatidagi o'rnini mustahkamlash, mintaqalarda fanni yanada rivojlantirish hamda iste'dodli va fidoiy olimlarni qo'llab-quvvatlash, yuqori intellektual muhit yaratishdagi milliy an'analarni rivojlantirishda qo'yilgan muhim qadam bo'ldi.