«fаlsаfа» modulidan oʼquv-uslubiy mаjmuа

Referat tayyorlash. Talabaga qiyinchilik darajasi uning shaxsiy imkoniyatlari, qobiliyati va bilim darajasiga muvofiq boʼlgan biror mavzu boʼyicha referat tayyorlash topshiriladi. Bunda talaba asosiy adabiyotlardan tashqari, qoʼshimcha adabiyotlardan (monografiyalar, ilmiy, uslubiy maqolalar, Internetdan olingan maʼlumotlar, elektron kutubxona materiallari va h.k.) foydalanib materiallar yigʼadi, tahlil qiladi, tizimga soladi va mavzu boʼyicha imkon darajasida toʼliq, keng maʼlumot berishga harakat qiladi. Zarur hollarda oʼqituvchidan maslahat va koʼrsatmalar oladi. Yakunlangan referat kafedrada ekspertlar ishtirokida himoya qilinadi.
Koʼrgazmali vositalar tayyorlash. Talabaga muayyan mavzuni bayon qilish va yaxshiroq oʼzlashtirish uchun yordam beradigan koʼrgazmali materiallar (jadvallar, chizmalar, rasmlar, grafiklar, namunalar va h.k.) tayyorlash topshiriladi. Mavzu oʼqituvchi tomonidan aniqlanib, talabaga maʼlum koʼrsatmalar, yoʼl-yoʼriqlar beriladi. Koʼrgazmali vositalarning miqdori, shakli va mazmuni talaba tomonidan mustaqil tanlanadi. Bunday vazifani bir mavzu boʼyicha bir necha talabaga topshirish ham mumkin. Talaba koʼrgazmali materiallardan foydalanish boʼyicha yozma ravishda tavsiyalar tayyorlaydi va auditoriyada amaliy mashgʼulotda himoya qiladi.
Mavzu boʼyicha testlar, munozarali savollar va topshiriqlar tayyorlash. Talabaga muayyan mavzu boʼyicha testlar, qiyinchilik darajasi har xil boʼlgan masalalar va topshiriqlar, munozaraga asos boʼladigan savollar tuzish topshiriladi. Bunda oʼqituvchi tomonidan talabaga testga qoʼyiladigan talablar va uni tuzish qonun-qoidalari, qanday maqsad koʼzda tutilayotganligi, muammoli savollar tuzishda mavzuning munozarali momentlarini qanday ajratish lozimligi, topshiriqlarni tuzish usullari boʼyicha yoʼl-yoʼriq beriladi. Maslahat soatlarida bajarilgan ishlarning qoʼyilgan vazifa va talablarga javob berish darajasi nazorat qilinadi (qayta ishlab kelish, aniqlashtirish yoki toʼldirish taklif etilishi mumkin). Test, savol va topshiriqlar majmuasi auditoriyada amaliy mashgʼulotda himoya qilinadi.