Falsafa” kafedrasi «G‘oyalar falsafasi» fanidan o‘quv-uslubiy majmua toshkent-2011

Ayol, ona – ezgulik timsoli. Mafkuraviy tarbiyada onaning alohida o‘rni va nufuzini hisobga olib, xotin-qizlarning bola tarbiyasi va oilaviy ro‘zg‘or ishlarini yuritish borasidagi bilimdonliklarini takomillashtirib borish, “onalar maktablari” tashkil etish ham katta amaliy ahamiyatga ega bo‘ladi. Chunki Prezidentimiz, hukumatimiz tomonidan ayollarga bildirilgan yuksak ishonchning zamirida bu mo‘’tabar zotlarga xos buyuk onalik mehr-muhabbati, ularning mafkuraviy tarbiyaga qo‘shajak kuch-g‘ayrati, noyob iste’dodlarining e’tirofi yotadi. Jahon madaniyati va ma’naviyatiga katta xissa qo‘shgan Muso Xorazmiy, Beruniy, Ibn Sino, Imom Buxoriy, Ahmad Farg‘oniy, Amir Temur, Ulug‘bek, Alisher Navoiy, Burhoniddin Marg‘inoniylarni dunyoga keltirib, tarbiya bergan momolarimizning vorislari bo‘lgan zamonaviy ayollar ham sog‘lom fikrlovchi, O‘zbekiston taraqqiyoti uchun butun bilim va iqtidorini ayamaydigan yoshlarni tarbiyalab berishiga shubha yo‘q. Zero, yurtboshimizning “Har qaysi jamiyatning madaniy darajasi va ma’naviy barkamolligi ayollarga bo‘lgan munosabat bilan belgilanadi”, deb ularning hayotimizdagi o‘rniga katta ahamiyat berayotgani bejiz emas.
An’analar, udumlar, rasm-rusmlar. Asrlar mobaynida shakllangan, avloddan-avlodga bebaho meros sifatida o‘tib kelayotgan urf-odat, marosim va bayramlar ham milliy mafkuraning asosiy g‘oyalarini singdirishda muhim omil bo‘ladi. Xususan, Mustaqillik, Navro‘z, o‘qituvchilar va murabbiylar, Xotira va qadrlash kuni kabi bayram va marosimlarimizning jamiyat hayotiga zamonaviy mazmun baxsh etish yo‘lida oqilona foydalanish zarur.
Bugungi kunda milliy an’analarimizni o‘rganish, targ‘ib etish bilan bir qatorda to‘y-ma’rakalarni, odat va udumlarni ixchamlashtirish, bu borada isrofgarchilik va dabdababozlikka yo‘l qo‘ymaslikka alohida e’tibor qaratish darkor. Bu urf-odat va an’analarning asosiy qismi oilada va oila a’zolarining bevosita ishtirokida o‘tkaziladi. Shuning uchun ham har bir oilaviy an’ana va udum mafkuraviy tarbiyaning muxim yo‘nalishi hisoblanadi. Har bir o‘zbek oilasida muqaddas sanaladigan mehmonnavozlik, qiz va o‘g‘il bolalar tarbiyasi borasida maxsus an’analarning mavjudligi, yil mavsumiga ko‘ra barcha oila a’zolari ishtirokida o‘tkaziladigan hasharlar, chaqaloqning dunyoga kelishi bilan bog‘liq hamma-hammasi ezgulikka, ya’ni sog‘lom mafkuraviy muhitni shakllantirishga xizmat qiladi.