Файзуллаев Саидкамол КЎнгил изҳори биринчи китобим ибтидо

ВАТАН НИМА АСЛИ?
Ватан нима асли? У нурли қалъа,
Ёшликда ўйноқлаб юрган кенг дала.

Ватан нима асли? Ойдин кечалар

Ялангоёқ чопиб юрган кўчалар.

Ватан нима асли? Ота маконим,

Қалдирғочлар уя қурган айвоним.

Ватан нима асли? Бепоён тоғлар,

Меҳр ва муҳаббат бўй чўзган боғлар.

Ватан нима асли? Ям-яшил ўтлоқ,

Бобожоним ётган муқаддас тупроқ.

Ватан нима асли? Улғайган бешик,

Онам айтган алла - сўнгги йўқ қўшиқ.


БАХТ ҲАҚИДА ШЕЪР
-Бахт бу нима асли, айтинг, онажон?
-Бахт бу - шундай улуғ, муқаддас калом.
Яхшиликка тўлса нурафшон жаҳон,
Тинчлик ва адолат яшнаса мудом.

Юрагим шодликдан ҳапқириб урса,

Бехуда кетмаса бебахо вақтим.
Ёнимда суянчим - отангиз турса,
Сизларнинг борингиз энг катта бахтим.

-Бахт бу нима асли айтинг, отажон?

-Бахт бу - ҳар инсоннинг номуси,ори.
Озод Ватанга наф келтириб ҳар он,
Бир кун бўлса дейман юрт ифтихори.

Бахт бу фарзандларим юзида кулгу,

Езгуликка тўлса кўнгил гулшани.
Зиё сочаверсин энг олий туйғу,
Кўзингизда ёнган илҳом гулхани.

-Бахт бу нима асли била олмадим,

Ҳар кимнинг ўзгача бахти бор экан.
Саодатни излаб сира толмадим,
Меҳр берган инсон бахтиёр экан!

Чин, ҳақиқий севги зинҳор ўлмайди,

Муҳаббатинг излаб ҳозир йўлга чиқ.
Бахтнинг эшигининг қулфи бўлмайди,
Унинг эшиклари ҳамиша очиқ.
ВАТАН СОҒИНЧИ
Дунёда Ватан кўп, эллар ҳам кўпдир,
Миллат дея ёнган диллар ҳам кўпдир,
Чамандан айрилган гуллар ҳам кўпдир,
Ватанни авайлаб, гулларга ўранг,
Соғинч нима асли, Бобурдан сўранг.

Аламли болалик, ғуссали ҳаёт,

Умр ғунчалари бўлганда барбод,
Қўлга қалам олиб ёзган бир баёт,
Болалик ситамми ёки ранг-баранг,
Соғинч нима асли, Бобурдан сўранг.

Хурсандчилик қайда, дўст-у ёр қайда,

Ўйнаб кулиш учун ихтиёр қайда,
Юртидан узоқда, бегона жойда,
Юрт ишқига ҳатто юқтирмаган чанг,
Соғинч нима асли, Бобурдан сўранг.

Ишонган яқинлар қилса ҳиёнат,

Уни тарк этмади ишонч, диёнат,
Ватан деб кўрсатди буюк матонат,
Юрт соғинчи қандай кучли бир қаранг,
Соғинч нима асли, Бобурдан сўранг.