Ёшлар стратегияси 2020-2025” лойиҳаси низоми I. Умумий қоидалар

“Ёшлар стратегияси 2020-2025” лойиҳаси
НИЗОМИ


I. Умумий қоидалар
1. “Ёшлар стратегияси 2020-2025” лойиҳаси ёшларга оид қонунчилик устидан парламент, депутатлик ҳамда жамоатчилик назоратини таъминлаш, ёшларнинг сиёсий-ҳуқуқий билимларини ошириш ва уларда етакчилик қобилиятларини шакллантириш, уларни сиёсий жараёнларга кенг жалб этиш, улар билан тўғридан-тўғри доимий мулоқот қиладиган майдонни яратиш, шунингдек Ўзбекистон “Миллий тикланиш” демократик партиясининг келгуси беш йилликда партиянинг Устави, Дастури ҳамда Сайловолди платформасида белгиланган устувор вазифаларини амалга оширишда талаба ёшлар иштирокини таъминлаш, ёшларнинг ижтимоий ташаббусларини моддий ва маънавий жиҳатдан қўллаб-қувватлашга ҳамда ўз тарафдорлари сафини кенгайтириш ва энг асосийси кўнгиллилар ҳаракатини ривожлантиришга қаратилган.
2. “Ёшлар стратегияси 2020-2025” лойиҳаси республика миқёсида барча олий таълим муассасалари ва ҳудудий партия ташкилотлари томонидан ташкил қилиниб, ижтимоий-сиёсий жараёнларда фаол кўнгилли ёшлар жалб этилади.
3. “Ёшлар стратегияси 2020-2025” лойиҳаси Ўзбекистон “Миллий тикланиш” демократик партияси ҳамда Ўзбекистон Республикаси Олий таълим вазирлиги ҳамкорлигида ташкил этилади ҳамда фаол талаба-ёшлар рағбатлантирилади.
II. Лойиҳанинг мақсад ва вазифалари
4. “Ёшлар стратегияси 2020-2025” лойиҳасини ўтказишдан асосий мақсад - Ўзбекистон “Миллий тикланиш” демократик партияси ғоя ва мақсадларини ёшлар ўртасида тарғиб қилиш, шу билан бирга уларнинг ғоявий, мафкуравий эҳтиёжларини ўрганиш ва қондириш, сиёсий-ҳуқуқий билимларини оширишга кўмаклашиш орқали фаол фуқаролик позициясига эга бўлишларини таъминлашдан иборат.
5. Қуйидаги вазифалар лойиҳа мақсадларини амалга оширишга хизмат қилади:
- давлат ва жамият ҳаётида, шунингдек ижтимоий-сиёсий жараёнларда ёшларнинг фаол иштирокини таъминлашга кўмаклашиш;
- фуқаролар, айниқса ёшларнинг сиёсий-ҳуқуқий маданияти ва ижтимоий онг даражасини ўстириш, уларнинг ахборот соҳасидаги ҳуқуқ ва эркинликларини таъминлаш;
- талаба-ёшлар билан алоқани йўлга қўйиш ва мустаҳкамлаш;
- ёшларнинг салоҳиятини рўёбга чиқариш, қобилиятларини намоён этиши учун имконият яратиш;
- ёшларга оид норматив-ҳуқуқий ҳужжатларни ишлаб чиқиш жараёнига талаба ёшларни кенг жалб этиш;
- ёшларнинг ижтимоий ташаббусларини моддий ва маънавий жиҳатдан қўллаб-қувватлаш ҳамда фаол ёшларни рағбатлантириб бориш.