Eritma konsentratsiyasini ifodalash usullari. Ishning maqsadi

Tajriba № 3. Kaliy bixromatning eruvchanligini aniqlash
Texno-kimyoviy tarozida 2 g kaliy bixromatning maydalangan kukunidan tortib oling va stakanchaga (50 ml) soling. Unga 10 ml distillangan suv quying. Stakanchani asbest to‘rga qo‘yib, tuz to‘liq eriguncha qizdiring. Olingan tiniq eritmani uy temperaturasigacha soviting. Eritma sovitilgandan keyin nima bo‘ladi? Kuzatilgan hodisani tushuntiring. Ajralib chiqqan kristallar stakan tubiga to‘liq cho‘kkandan keyin va cho‘kma ustidagi eritma mutlaqo tiniq bo‘lganda, oz miqdordagi (2 ml) shu eritma bilan quruq katta probirka (10 ml) chayqaladi va unga eritma quyiladi. Bunda probirkaga kristallarning tushmasligiga e’tibor bering. Eritma temperaturasini o‘lchang. Ayni temperaturada bu eritmani to‘yingan eritma deyish mumkinmi? Texno-kimyoviy tarozida byuksni torting, quruq pipetka bilan probirkadan 3 ml eritma oling va byuksga quying. Byuksni eritma bilan tortib, quritish shkafiga o‘rnating va 90⁰C da suvi to‘liq bug‘languncha qo‘ying. Keyin temperaturani 150⁰C ga ko‘taring va tuzni 30 min davomida qizdiring. Shundan keyin byuksni tuzi bilan eksikatorda uy temperaturasigacha soviting va torting. Bu jarayonni 150⁰C da qaytaring va yana byuksni tuzi bilan torting. Quritish va tortishda bir xil natija olgunga qadar jarayon qaytariladi. Tajriba natijalari quyidagi shaklda yoziladi:
To‘yingan eritma temperaturasi - t ⁰C
Eruvchanlikni aniqlash uchun olingan eritma hajmi-V, ml
Byuks massasi - m₁, g
Byuksning eritma bilan massasi - m₂, g
Bixromat eritmasining massasi - m₃ = m₂ - m₁, g
Byuksning quruq tuz bilan massasi, 1- tortish m₄, g
2- tortish m₄^II, g
Quruq bixromat og‘irligi - m₅ = m₄- m₁, g
Olingan natijalar asosida bixromatning to‘yingan eritmasi (eruvchanligi) konsentrasiyasini foizlarda va mol/litrlarda hisoblang, eritmaning zichligini areometr yordamida aniqlang.
To‘yingan eritmalar tayyorlash.
Eritmalar erigan moddalar konsentrasiyasiga qarab to‘yingan, to‘yinmagan va o‘ta to‘yingan bo‘ladi.