Ёнfин хавфсизлиги

Ёнғин бўлган жойни кўздан кечиришнинг асосий зоналари, босқичлари ва турлари / 2; 7/

Ёнғин бўлган жойни кўздан кечиришнинг иккита асосий зонаси мавжуд:
- ёнғин бўлган жой атрофидаги ҳудуд;
- ёниш зонаси.
Биринчи зонага ёниш зонасига қўшилиб кетган, лекин ёнмаган бино қисмлари, шунингдек терговчи кўздан кечирилиши лозим деб топган ёнғин бўлган жой атрофидаги бошқа жойлар ҳам киради. Бу жойларни кўздан кечиришда терговчи ёки суриштирувчидан ёнғиннинг ўзига хос оқибатларини тушуниб етиш учун махсус билимларга эга бўлиш сифатлари талаб қилинмайди.
Ҳар бир зонани кўздан кечириш ўзига хос хусусиятларга эга. Кўздан кечиришнинг кетма-кетлиги эса ёнғиннинг оқибатлари ва ҳолатларига қараб аниқланади.
Шу нарсани қайд қилиб ўтиш лозимки, ёниш зонасидан ташқарида жойлашган ҳудудларни, бино қисмларини, хоналарни кечиктирмасдан – «қайноқ излар» бўйича кўздан кечириш жуда муҳимдир. Фақат бир ҳолатдагина, яъни тунда кўздан кечирилганда уни юзаки ўтказиб, батафсил текширишни эрталабга қадар қолдириш мумкин, лекин тонг отиши биланоқ уни синчковлик билан қайтадан кўздан кечириб чиқиш зарур бўлади.
Агар ёнғин қасддан ўт қўйиш оқибатида содир этилганлиги ҳақида қанақадир маълумотлар мавжуд бўлса, унда жиноятчи томонидан қолдириб кетилган бўлиши мумкин бўлган нарсаларни излаб топиш зарур бўлади: унинг кирган ёки чиққан излари, бузиш асбоблари, ўт қўйиш воситалари, енгил ёнувчан ёки ёнувчан суюқликлар солиниши эҳтимоли бўлган идишлар, уларнинг қолдиқлари ёки аломатлари (белгилари) ва шу кабилар. Бу қоидалар ёнғин бўлган жойни кўздан кечиришга ҳам тааллуқлидир.
Барча ҳолатларда ҳам, сутканинг қайси пайтидан қатъий назар, ёниш зонаси атрофидаги теварак-атроф ва хоналарни кўздан кечиришнинг кетма-кетлиги аниқ бўлиши, режа асосида ва маълум бир тизим асосида ўтказилиши шартдир. Агар бевосита ёнғин бўлган жойда ўт ўчириш ишлари, одамлар, ҳайвонлар ва моддий бойликларни қутқариш ишлари олиб борилганлиги бизга маълум бўлса, унда бу жойда ашёвий далиллар ва изларнинг сақланмай қолиши эҳтимолини эътиборга олган ҳолда у ерни янада синчиклаб кўздан кечириш зарурати туғилади.
Кўздан кечиришнинг босқичлари. Ҳодиса жойини кўздан кечириш кўпинча икки босқичда амалга оширилади: статик ва динамик.