Ёнfин хавфсизлиги

24. ЁХҚ навбатчи сменасининг хавф белгиси пайтида ҳаракатланиш тартиби /1/
Ёнғин хавфсизлиги қисмининг навбатчи сменаси хавф белгиси бўйича ҳаракат қилишга доимо тайёр туриши керак.
Хавф белгиси қуйидаги ҳолатларда берилади:
-ёнғин ва табиий офат содир бўлганлиги ҳақида хабар олинганда;
-фуқаро муҳофазаси хабари олинганда;
-машқ ва машғулотлар ўтказиш пайтида;
-сменанинг жанговарлигини текшириш вақтида.
Хавф белгиси берилганда:
-сменанинг жанговар ҳисобидаги шахсий таркиб жанговар кийимларини киядилар;
-жанговар ҳисоб рўйхатига асосан ёнғин ўчирувчилар гараж дарвозаларини очадилар;
-ҳайдовчилар автомобиллар двигателини ишга туширадилар, шахсий таркиб автомобилда ўз ўринларини эгаллайди.
Навбатчи сменанинг жанговар ҳисобидаги шахсий таркибни ёнғин ўчириш автомобилларига чиқишларини хавфсизлик шартларидан келиб чиқиб, қисм бошлиғининг ихтиёрига кўра гараж дарвозаларидан ташқарида амалга ошириш мумкин. Смена бошлиғи диспетчердан чиқиш йўлланмасини, ёнғин ўчириш тезкор режаси (варақаси)ни олади, чиқиш йўлланмасини экипаж командирларига беради ва бош автомобилга чиқиб юришга буйруқ беради.
Ёнғин хавфсизлиги қисмининг чиқиш тумани ёнғин хавфсизлиги гарнизони бошлиғи томонидан белгиланади. Саноат корхоналарини муҳофаза қилувчи ёнғин хавфсизлиги қисмларининг чиқиш радиуси қурилиш меъёри ва қоидалари билан ҳамда корхонада ёнғин чиқиш хавфи даражасига қараб белгиланади.
Гарнизон ёнғин хавфсизлиги қисмларининг чиқиш жадвали, ёнғин содир бўлганлиги тўғрисида биринчи хабар берилгандаёқ куч ва воситалар юқори чақириқ билан юбориладиган корхоналар рўйхати навбатчи ёнғин ўчириш штаби хонасида ва ҚДХ да бўлиши керак (9-илова).
Махсус ёнғин ўчириш автомобилларининг чиқиши ёнғин хавфсизлиги гарнизонлари томонидан белгиланади. Корхоналарни муҳофаза қилувчи ёнғин хавфсизлиги бўлинмаларини корхона ҳудудидан ташқарида содир бўлган ёнғинларни ўчиришга ёки табиий офат оқибатларини тугатишга чиқиш тартиби гарнизон ёнғин хавфсизлиги қисмларининг чиқиш жадвалига асосан белгиланади.
Ўта муҳим ва тоифаланган объектларни муҳофаза қилаётган бўлинмалар корхона ҳудудидан ташқарига чиқиб кетганда, ёнғин хавфсизлиги қисми бошлиғи корхонада хизматни кучайтириши лозим, агарда шу вақтда ёнғин содир бўлса, корхонада мавжуд бўлган куч ва воситалар ёрдамида кўнгилли ёнғин ўчириш тузилмаларини жалб қилган ҳолда ёнғинни ўчириш чора-тадбирларини кўриши керак.
Ёнғин хавфсизлиги қисмининг хизмат ҳужжатлари қисм бошлиғи (отряд командири) томонидан ишлаб чиқилади (Ўз Р ИИВ №117-сонли буйруқ, 10-илова).