Elektrotexnika

O`zbekiston Respublikasida “O`zstandart” agentligi tashkiloti haqida
Vazirlar Mahkamasining “O`zbekiston Respublikasida standartlashtirish bo`yicha ishlarni tashkil qilish” to`g`risidagi 1992 yil 2 martdagi 93-sonli qaroriga muvofiq O`zbekiston Respublikasining Vazirlar Mahkamasi huzuri-dagi Standartlashtirish, metrologiya va sertifikatlashtirish O`zbekiston davlat markazi, keyinchalik (“O`zstandart” agentligi) - standartlashtirish bo`yicha Milliy idora hisoblanadi.
Uning vakolatiga quyidagilar kiradi:

• 
  metrologiyaga oid faoliyatni mintaqalararo va tarmoqlararo muvofiqlashtirish;
  
• 
  fizikaviy kattaliklar birligi etalonlarini yaratish, tasdiqlash, saqlash va qo`llash qoidalarini belgilash;
  
• 
  o`lchash vositalari, usullari va natijalariga qo`yiladigan umumiy metrologik talablarni aniqlash;
  
• 
  davlat metrologik tekshiruvini va nazoratini amalga oshirish;
  
• 
  metrologiya masalalari bo`yicha me`yoriy hujjatlarni, shu jumladan, davlatning boshqa boshqaruv idoralari bilan hamkorlikda O`zbekiston Respublikasining butun hududida majburiy kuchga ega bo`lgan me`yoriy hujjatlarni qabul qilish;
  
• 
  metrologiya sohasida ilmiy va muhandis-texnik kadrlarni tayyorlash;
  
• 
  O`zbekiston Respublikasining metrologiya sohasidagi xalqaro shartnomalariga rioya etilishini ustidan nazoratni amalga oshirish;
  
• 
  metrologiya masalalari bo`yicha xalqaro tashkilotlar faoliyatida qatnashish kiradi.
  

“O`zstandart” tarkibida bir necha bo`limlar, sektor, laboratoriya, guruhlar, har bir viloyat boshqarma va markazlari, ilmiy-tadqiqot instituti, Milliy Etalonlar Markazi mujassamlashgan.
“O`zstandart” agentligiga qarashli turli soha va tarmoqlarni o`z ichiga olgan, bir xil nomdagi bo`limlar ham bor. Bularga standartlar va mahsulotni sertifikatlashtirish bo`yicha davlat nazorati va o`lchash vositalarini davlat qiyoslovidan o`tkazish va attestatlash sohaviy bo`limlari kiradi.
Standartlar va mahsulotni sertifikatlashtirish bo`yicha davlat nazorati sohaviy bo`limlar: og`ir sanoat, mashinasozlik, yengil sanoat, mahalliy sanoat hamda agrosanoat kompleksi doirasida o`z faoliyatini amalga oshiradi.
“O`zstandart” agentligining ilmiy-uslubiy markazi etib, O`zbekiston Respublikasida standartlashtirish, metrologiya, sertifikatlashtirish va mahsulot sifatini boshqarish sohalaridagi tadqiqot va mutaxassislar malakasini oshirish va qayta tayyorlash instituti - hozirda standartlashtirish, metrologiya va sertifikatlashtirish ilmiy-tadqiqot instituti tayinlangan.
Sertifikatlashtirish milliy idorasi quyidagi asosiy yo`nalishlar bo`yicha o`z faoliyatini amalga oshirmoqda:

• 
  Respublikada sertifikatlashtirishni qo`llash va takomillashtirishning umumiy siyosatini ishlab chiqish, qonun chiqaruvchi va ijro etuvchi tegishli davlat idoralari bilan aloqalarni o`rnatish;
  
• 
  sertifikatlashtirish masalalari bo`yicha boshqa mamlakat va xalqaro tashkilotlarning vakillari bilan, o`zaro kelishilgan asosda aloqalarni o`rnatish, kerak bo`lsa, bu tashkilotlar faoliyatida O`zbekiston Respublikasining qatnashishini ta`minlash;
  
• 
  sertifikatlashtirishda yagona qoida va ish tartiblarini belgilash, bularga rioya qilishning nazorati, sertifikatlashtirish natijalari bo`yicha hujjatlarni axborotli ma`lumot bilan ta`minlash.
  

Vazirlar Mahkamasining 2002 yil № qarorini bajarish yo`lida “O`zstandart” o`zining viloyat boshqarmalarini (SMShM) tuzib, ularning ishlariga hartaraflama ko`mak ko`rsatmoqda. Respublikadagi sinov laboratoriyalarini akkreditlash ishlari jadal qadamlar bilan amalga oshirilmoqda. Farg`ona, Qo`qon, Qarshi, Buxoro, Samarqand shaharlaridagi sinov laboratoriyalari akkreditlanib, hozirda ular turli sinov amallarini o`tkazmoqdalar. Faqatgina Farg`onadagi sinov laboratoriyasida o`tkazilgan sinovlar natijasiga ko`ra “Azot” ishlab chiqarish birlashmasi, Quvasoy chinni zavodi, Rishton kulolchilik mahsulotlari zavodi, “O`zstandart” agentligi tarkibidagi oziq-ovqat va qishloq xo`jalik mahsulotlarini tekshiruvchi sinov laboratoriyasi akkreditlangan laboratoriyalardan hisoblanib, shu kungacha o`nlab, muayyan turdagi mahsulotlarga muvofiqlik sertifikati berildi.