Elektr energetikada nazorat bo‘yicha davlat inspeksiyasi boshlig‘ining

§ 7. Payvandlash ishlari va kavsharlash lampasi bilan ishlash

249. Elektr payvandlash, gazalangali va boshqa olovli ishlar bajarilayotganda quyidagi hujjatlar talablariga rioya qilinishi shart: “SSBT. Elektr payvandlash ishlari. Xavfsizlik talablari” GOST 12.3.003, Atsetilen, kislorod ishlab chiqarishda va metallarga gazalangali ishlov berishda xavfsizlik texnikasi va ishlab chiqarish sanitariyasi qoidalari, gaz xo‘jaligida xavfsizlik qoidalari, bosim ostida ishlaydigan idishlarning tuzilishi va xavfsiz ekspluatatsiya qilish qoidalari, xalq xo‘jaligi obyektlarida payvandlash va boshqa olov ishlari o‘tkazilayotganda yong‘in xavfsizligi qoidalari, metallarni payvandlashda, suyultirib qoplashda va kesishda sanitariya qoidalari, “Qurilishda xavfsizlik texnikasi” KMK 3.01.02 va “Iste’molchilarning elektr qurilmalarini texnik ekspluatatsiya qilish qoidalari” (2004-yil 9-iyul, ro‘yxat raqami 1383 — O‘zbekiston Respublikasi qonun hujjatlar to‘plami, 2004-yil, 27- son, 317 - modda).

250. Payvandlash uskunalari quyidagi hujjatlarga muvofiq bo‘lishi shart: “SSBT. Metalllarga gazalangali ishlov berish va termik changlatish bilan qoplash uchun uskunalar va apparatlar. Xavfsizlik talablari” GOST 12.2.008, “SSBT. Plazmali ishlov berish uchun elektrpayvandlash qurilmalari. Xavfsizlik talablari” GOST 12.2.007.8, “SSBT. Atsetilen quvurlari. Xavfsizlik talablari” GOST 12.2.060, “SSBT. Gazsimon kislorod bilan ishlovchi uskunalar. Umumiy xavfsizlik talablari” GOST 12.2.052 va “Elektr qurilmalarning tuzilish qoidalari” .

251. Ishlab turgan uskunalar zonasidagi va ishlab chiqarish xonalaridagi uskunalarda olovli ishlar mazkur Qoidalarda nazarda tutilgan naryad bo‘yicha bajarilishi shart. Naryadning “Xavfsizlik choralarini ta’minlash uchun” satrida ish joyini tayyorlash va xavfsizlik choralari bo‘yicha tadbirlardan tashqari yong‘in xavfsizligi talablari ko‘rsatilishi shart. Bu vaziyatda naryad bir vaqtning o‘zida payvandlash ishlarini o‘tkazishga ham ruxsat bo‘ladi. Yong‘in xavfini darajasi bo‘yicha ish joyining tavsifiga bog‘liq holda naryad yong‘in xavfsizligi xizmatining vakili yoki korxonaning yong‘in xavfsizligi uchun mas’ul qilib tayinlangan vakili tomonidan imzolanadi.

Olovli ishlarni bajarish uchun sex boshlig‘i (yoki uning vazifasini bajaruvchi shaxs), yong‘in xavfi bor uskunalarda esa bosh muhandis (yoki uning vazifasini bajaruvchi shaxs) naryad berish huquqiga ega.