E. H. Eshboyev, Y. M. Fayziyev teri va tanosil kasalliklari

Ikkilamchi morfologik elementlar. Bularga quyidagilar kiradi: pigment dog'lar (pigmentatio), tangacha (squama), qora qo'tir po'st (crusta), yoriqlar (fissura), ekskoriatsiya, tirnalish (excoriatio), eroziya (erosio), yara (ulcus), chandiq (cicatrix), vegetatsiya (vegetationes), lixenifikatsiya (lichenificatio).

Pigment dog'lar (pigmentatsiya, teri disxromiyasi — dischromia cutis) — terida pigmentlanishning buzilishi. Odatda birlamchi ele-mentning o'rnida paydo bo'ladi. Masalan, zaxmdagi papulalar, maddalar, ba'zi dermatozlarda eroziya va yaralar o'rnida giper-pigmentlangan dog'lar qoladi. Bunday o'zgarish aksariyat yallig'langan o'choqlarda melanin hosil bo'lishining ortishi va gemosiderin kabi qon pigmenti chiqishidan yuzaga keladi.

Tangacha — muguz qavatning ko'chib tushadigan yadrosiz hujayralari. Odatda odam terisidan fiziologik ravishda o'z umrini yashab bo'lgan muguz qavat hujayralari tangacha bo'lib tushib ketadi. Ayniqsa, ular yuvinganda, kiyim-kechak badanga ishqalanganda ko'plab ajraladi. Ayrim kasalliklarda tangachalar yengil ko'chadi (tangachali temiratki), ba'zan teridagi elementlar bag'riga mahkam bog'langan bo'lib (chandiqli eritematoz), ularning ko'chishi bir qadar og'riq bilan kechadi (Bene-Mesher simptomi). Distrofik va destruktiv jarayonlarga qarab tangachalar mayda va yirik bo'lishi mumkin.