Dori vositalarining sanoat texnologiyasi

8-MA’RUZA
Mavzu: Farmatsevtik korxonalar ish faoliyatida magnit maydonidan saqlanish.


Reja

1. 
   O‘zgaruvchan elektromagnit maydonlarining inson organizmiga ta’siri.
   
2. 
   Elektromagnit maydonining normalari. Muhofaza usullari
   
3. 
   Elektromagnit maydonlarni ta’siridan himoyalashning asosiy usullari va vositalari.
   
4. 
   SHaxsiy himoya vositalari.
   
5. 
   Lazer nurlaridan saqlanish
   

Hozirgi zamon texnika taraqqiyoti davrida yuqori chastotalarga ega bo‘lgan magnit maydonlaridan har xil texnika ishlarida, masalan, metallarni qizdirib toblash, eritish, yog‘och mahsulotlarini elimlash va boshqa ishlarda keng foydalanilmoqda. Bunday vositalar bilan texnik operatsiyalarni bajarishning qulayligi ortiqcha issiqlikning ajralmasligi va ortiqcha uskunalarga bo‘lgan ehtiyojning kamayishi bu usulning keng ko‘lamda qo‘llanish imkoniyatlarini yaratmoqda. Bundan tashqari, bu usul ish sharoitini yaxshilash va ish joylarida havoning tozaligini ta’minlanganligi sababli sanitariya-gigiena tomonidan birmuncha qulayliklar tug‘diradi.
Hozirgi vaqtda radio va elektron qurilmalarining keng ko‘lamda qo‘llanilishi, radiotelemetriya, radionavigatsiya, kompyuterlar va boshqa elektromagnit tebranishlarga asoslangan elektr uskunalarlarning keng ko‘lamda qo‘llanilishi, radio apparaturalar bilan ko‘pchilik ishchilarning muloqotda bo‘lishiga olib kelmoqda.
SHuning uchun ham hozirgi vaqtda elektromagnit tebranish to‘lqinlaridan muhofazalanish chora-tadbirlarini amalga oshirish taqozo qilinmoqda. Keyingi vaqtlarda elektromagnit to‘lqinlari inson organizmiga xatarli ta’sir ko‘rsatishi aniqlandi. Bu ta’sirning xatarli tomoni shundaki, inson bu nurlar ta’siriga tushganligini sezmaydi.
Ishlab chiqarishda nurlanishlarning quyidagi turlari tarqalgan: infraqizil, ultrabinafsha, elektromagnit va radioaktiv. Elektromagnit nurlarining manbai radio to‘lqinlar, elektr uzatish tarmoqlari va har xil yuqori chastotali generatorlar, transformatorlar, antennalar, to‘lqin uzatgichlarning ochiq qismlari, induktorlar, termik qurilmalarning kondensatorlari va tebranuvchi konturlarni ekranlashtirilmagan elementlari bo‘lishi mumkin. Ko‘rsatilgan qurilmalar ishida ularni o‘rab turgan makonida EM xosil bo‘ladi.