Диссертация мавзусининг долзарблиги

Диссертация мавзусининг долзарблиги. Ҳозирги кунда тоза чучук сув тақчиллиги глобал миқёсдаги муаммога айланган ва шу туфайли дарёлар сув ресурсларидан самарали фойдаланиш масалаларига янада кўпроқ эътибор қаратилмоқда.
Бугунги кунда чучук сувга бўлган талабнинг йилдан-йилга ортиб бораётганлиги ва айни пайтда, инсон омили таъсирида унинг миқдоран камайиб, сифатининг эса ёмонлашиб бориши шароитида сув ресурсларини бошқаришни янада такомиллаштириш ҳамда улардан самарали ва тежамкорлик билан фойдаланишга қаратилган тадқиқотларни олиб бориш долзарб ҳисобланади.
Муаммонинг ўрганилганлик даражаси. Зарафшон дарёси оқимининг йиллараро ўзгарувчанлиги ва йил давомида тақсимланишини В.Л.Шульц, О.П.Щеглова, А.З.Зоҳидов, В.А.Духовный, Ф.Э.Рубинова, Ю.Н.Иванов, А.Р.Расулов каби олимлар ўрганганлар. Ҳозирги кунда ушбу йўналишдаги изланишлар В.Е.Чуб, Э.И.Чембарисов, М.А.Якубов, С.В.Мягков, Ф.Ҳ.Ҳикматов, Н.Е.Горелкин, Ф.Я. Артикова, Б.Е.Аденбаев, Ғ.Х.Юнусов, С.А.Ҳайдаров каби тадқиқотчилар томонидан давом эттирилмоқда.
Бироқ, мазкур тадқиқотларда Зарафшон дарёси оқимининг йиллараро ўзгарувчанлиги ва йил давомида тақсимланишини айниқса, унинг ўрта ва қуйи қисмида ўзгариши масалалари атрофлича ёритилмаган.
Тадқиқотнинг мақсади Зарафшон дарёси оқимининг йиллараро ўзгарувчанлиги ва йил давомида тақсимланишини сўнгги йиллардаги маълумотлар асосида ўрганишдан иборат.
Тадқиқотнинг вазифалари:
Зарафшон дарёси ҳавзасига табиий географик тавсиф бериш;
Зарафшон дарёси оқимини узунлик бўйича ўзгаришини тадқиқ этиш;
Зарафшон дарёси оқимининг йиллараро ўзгарувчанлигини тадқиқ этиш;
Зарафшон дарёси оқимининг йил давомида ойлар ва мавсумлар бўйича тақсимланишини кўриб чиқиш.
Тадқиқотнинг объекти сифатида Зарафшон дарёси ҳавзасининг Ўзбекистон қисми, яъни унинг ўрта ва қуйи оқимлари танлаб олинган.
Тадқиқотнинг предметини Зарафшон дарёси ўрта ва қуйи оқимнинг йиллараро ўзгарувчанлиги ва йил давомида тақсимланишини дарё узунлиги бўйича ўзгаришлари хусусиятларини тадқиқ этиш масалалари ташкил этган.