Диний секта маълум бир диндаги ақидаларга зид равишда ажралиб чиққан, мавжуд динлар ва конфессияларга умуман алоқаси бўлмаган ҳолда дин байроғи остида фаолият юритадиган гуруҳлардир

Турли минтақалардаги мамлакатларнинг ижтимоий-сиёсий барқарорлигини издан чиқариб, яхлит халқларнинг миллий-диний аҳиллигига путур етказган ҳар хил сиёсий найранглар, дин ниқоби остидаги ғаразли ўйинларнинг аянчли оқибатлари бунга мисолдир. Диний секталарнинг ҳам мақсади халқларни ана шундай маънавий таназзулга етаклашдир.
Диний секта маълум бир диндаги ақидаларга зид равишда ажралиб чиққан, мавжуд динлар ва конфессияларга умуман алоқаси бўлмаган ҳолда дин байроғи остида фаолият юритадиган гуруҳлардир. Бунда маълум бир диннинг ақидавий таълимотларига зид ёки умуман янги тушунчалар секта аъзоларининг онгига мажбуран тиқиштирилади. Шунингдек, секталар деструктив ва тоталитар руҳга эга бўлиб, бу онги заҳарланган инсонларнинг кўр-кўрона секта ички қоидаларига бўйсуниши, жамият ва давлатга зарар етказишида намоён бўлади.

Секталар фаолиятининг бир қатор белгилари бор. Мисол учун, секта аъзоларига ахборот олиш манбалари чегараланади ва ташқи оламдан узиб қўйилади. Секта раҳнамолари ўз аъзоларининг диний саводсизлигини билган ҳолда ислом, христианлик, буддавийлик ва яҳудийлик динларининг муқаддас китобларидан иқтибослар келтиради. Ҳозирги динлар ўз аслиятини йўқотганлиги, дунёга янги таълимот зарурлигини айтади.

Айниқса, улар охирзамон ҳақида кўп суҳбат қуради. Сабаби, бу инсонни руҳий тушкунликка тушириб, руҳиятини остин-устун қилиб юборади ва эртанги кунга умидини сўндиради. Мол-мулки ва даромадини секта ихтиёрига топшириб, ўзлари кўчада қолади.
Шу нуқтаи назардан ҳар бир инсон доимо огоҳ бўлиб, диний-маънавий меросимизга оид пухта билимни эгаллаши лозим. Айниқса, ёшлар орасида муқаддас ислом дини ҳадислари асосида маърифий, тарбиявий суҳбатларни кўпроқ ташкил қилиш уларни бу каби иллатлардан асрашда муҳим омил бўлади.