Covid-19 pandemiyasi sharoitida inqirozga qarshi ijtimoiy-iqtisodiy dasturlar

XI bob. Eksport sohasidagi asosiy chora-tadbirlar

Ushbu bosqichda eksportyorlar duch keladigan asosiy qiyinchiliklar quyidagilardan iborat:

a) eksportga yetkazib berishda to‘lov muddatlarining oshishi sababli, aylanma mablag‘larning yetishmasligi;

b) eksport bozorlarida mahalliy mahsulotlarga bo‘lgan talabning qisqarishi va narxning pasayishi;

v) tashqi bozorlarda karantin cheklovlari joriy etilishi munosabati bilan transport xarajatlarining oshishi.

Yuqoridagi muammolarni echishda eksportyorlarga ko‘maklashish maqsadida Amaliy harakatlar rejasi qo‘yidagilarni o‘z ichiga oladi:

a) 2020-yil yakuniga qadar bo‘lgan davrda:

eksportni 17 milliard dollar miqdorida ta’minlash;

eksport salohiyatini rivojlantirish bo‘yicha Respublika komissiyasi faoliyati doirasida eksport qiluvchilarga ko‘maklashish orqali doimiy va tizimli ravishda maqsadli ishlarni amalga oshirish;

mahalliy mahsulotlarni yetkazib berish bo‘yicha xorijiy hamkorlar bilan qat’iy shartnomalar tuzishni yo‘lga qo‘yish;

pandemiya munosabati bilan tashqi bozorlarda talab ortgan eksport mahsulotlarini tezkor yetkazib berish choralarini ko‘rish;

savdoni moliyalashtirishning zamonaviy vositalaridan foydalanishni yanada kengaytirish;

eksport qiluvchilarga meva va sabzavot mahsulotlarini xarid qilish uchun naqd pul shaklidagi kreditlarni qaytarish muddatini 180 kungacha uzaytirish;

eksport tushumi tushish muddatini 120 kundan 180 kunga uzaytirish;

eksportda avtomobil, temir yo‘llari va havo transportida tashish hizmatlari xarajatlarining bir qismi kompensatsiya qilinadigan mahsulotlar ro‘yxatini 68 tadan 184 tagacha kengaytirish;

tijorat banklarining eksportdan oldingi kreditlari bo‘yicha, shu jumladan, eksport qiluvchilarning aylanma mablag‘larini to‘ldirish uchun Tadbirkorlikni qo‘llab-quvvatlash Davlat jamg‘armasi kafolatlarining maksimal miqdorini 25 milliard so‘mga oshirish;

kredit hajmi va tijorat banki tomonidan belgilangan stavkadan qat’i nazar, eksportchilarga eksportdan oldingi moliyalashtirish va aylanma mablag‘larni to‘ldirish uchun berilgan ssudalar bo‘yicha foiz xarajatlarini qoplash.

b) 2021-yil yakuniga qadar bo‘lgan davrda:

sanoatning qayta ishlash tarmoqlarini rivojlantirishning asosiy yo‘nalishlarini ishlab chiqish, xususan, 2021-yilda to‘qimachilik mahsulotlari eksportini 1,5 barobarga; elektrotexnika mahsulotlari eksportini 1,3 barobarga; ipakchilik, charm va boshqa tarmoq mahsulotlari eksportini kamida 20 foizga oshirish;

eksport faoliyatining obyektiv va aniq natijalari bilan bog‘liq bo‘lgan eksport qiluvchilarni davlat tomonidan rag‘batlantirish tizimini ishlab chiqish;

O‘zbekiston uchun MDHning Erkin savdo zonasi to‘g‘risidagi bitimni qo‘llash shartlari muddatlarini uzaytirish;

O‘zbekiston uchun Yevropa ittifoqining “GSP+” benefitsiar maqomini olish;

meva-sabzavot mahsulotlarini eksport qilish uchun yo‘l-transport infratuzilmasini rivojlantirish (saralash, saqlash, qayta ishlash va logistika), avtotransport parklarini kengaytirish;

eksport qiluvchilar guruhi uchun meva-sabzavot mahsulotlarini eksport qilish uchun karantin ruxsatnomalarini olish mexanizmini joriy etish;

Xitoy Xalq Respublikasi va Yevroosiyo iqtisodiy ittifoqi mamlakatlariga chorvachilik mahsulotlarini eksport qilishni tashkil etish maqsadida mahalliy parrandachilik va chorvachilik mahsulotlarini eksport qiluvchilarga tegishli ruxsatnomalarni olish bo‘yicha ishlarni olib borish.