Buyrug‘i maktabgacha ta’limga qo‘yiladigan davlat talablarini tasdiqlash haqida

2-§. O‘qish va savod malakalarini egallash
61. 6 oylikkacha bo‘lgan bolalarning bosma materiallar, harflar va ramzlarga qiziqish
bildirishi hamda yozish ko‘nikmalarini o‘rganishi, ularda o‘qish va savod malakalari
rivojlanishining talablari hisoblanadi.
62. Quyidagilar 6 oylikkacha bo‘lgan bolalarda o‘qish va savod malakalari indikatorlari
hisoblanadi:
qog‘oz yoki gazetani g‘ijimlab tashlash;
rangli kitoblarni tomosha qilish;
devordagi rasmlar va plakatlarni tomosha qilish;
ikki qo‘li bilan yozuv asboblarini (uchi ochilmagan rangli qalamlar, yopiq ruchkalar,
rangli markerlar) ushlab turish va ular bilan o‘ynash.
63. 6 oylikkacha bo‘lgan bolalar bilan quyidagi mashqlarni muntazam ravishda bajarib
turish lozim:
bolaga qog‘oz parchasi berish va bolaning undan qanday foydalanishini kuzatib turish;
bolaga chiroyli bezatilgan kitob berish va uning kitobni tomosha qilishini
rag‘batlantirish;
bolaning oldiga tartibsiz ravishda bir necha rasmlarni qo‘yish;
bolaga katta marker yoki flomaster berish va ularni qo‘lida ushlab turishga undash.
64. Bolaning xavfsiz yashashi va harakatlanishini ta’minlash uchun uning turli
buyumlarni og‘ziga solmasligini kuzatib turish lozim.
VII bob. Bilish jarayoni va atrof muhit to‘g‘risidagi bilimlarga ega bo‘lish
1-§. Elementar matematik ko‘nikmalar va bilimlarni rivojlantirish
65. 6 oylikkacha bo‘lgan bolalarning sonlar va sanashga qiziqishni namoyish etishi,
buyumlarni turkumlash va ularni tartib bo‘yicha joylashtirish ko‘nikmalarini orttirishi ularda
elementar matematik ko‘nikmalar va bilimlar rivojlanishining talablari hisoblanadi.
66. Quyidagilar 6 oylikkacha bo‘lgan bolalarda elementar matematik ko‘nikmalar va
bilimlar rivojlanishining indikatorlari hisoblanadi:
ko‘p sonli o‘yinchoqlarga qiziqish bildirish;
o‘z xatti-harakatlari bilan bosh kiyimi o‘ziga to‘g‘ri kelmayotganligini ko‘rsatish;
so‘rg‘ich yoki shishachani og‘ziga tortish.
67. 6 oylikkacha bo‘lgan bolalar bilan quyidagi mashqlarni muntazam ravishda bajarib
turish lozim:
ular bilan o‘ynayotganda o‘yinchoqlarning sonini ko‘paytirib borish;
qalpoqchani qo‘g‘irchoqlar va atrofdagilarning boshiga kiydirib, bolaga o‘rgatish va o‘z
boshiga mustaqil kiyishga harakat qilishini rag‘batlantirish.
68. Mazkur Davlat talablarining 67-bandida nazarda tutilgan mashqlarni bajarish
muddati 2-3 daqiqadan oshmasligi lozim.