Bulardan tashqari, tovush o'zgarishlarining yana quyidagi ko’rinishlari mavjud

Hamma holatlarda ham yuqoridagicha ma’nodoshlik yuzaga kelavermaydi. Masalan, nodavlat tashkilotlari deyish o‘rniga bedavlat tashkilotlari deyilsa, uslubiy g‘alizlik yuzaga keladi.
Demak, qo‘shimchalardagi ma’nodoshlik nutqning muayyan davrdagi me’yorlari asosida yuzaga keladigan til hodisasi sanaladi.
Qo‘shimchalarda zid ma’nolilik
Nutqni ravon, ta’sirchan, emotsional-ekspressiv jihatdan bo‘yoqdor bo‘lib chiqishida zid ma’noli qo‘shimchalardan foydalanishning ahamiyati katta.
Masalan, -li qo‘shimchasi -siz, be- no- qo‘shimchalariga nisbatan qarama-qarshi qo‘yiladi. Aqlli - aqlsiz, iboli - beibo, o‘rinli - noo‘rin kabi.
Bunday qo‘shimchalar, asosan, sifat so‘z turkumida ishlatiladi. Ser- qo‘shimchasi be- qo‘shimchasiga, ba-qo‘shimchasi -siz qo‘shimchasiga, bo- qo‘shimchasi -siz va be- qo‘shimchalariga, -dor qo‘shimchasi -siz va be- qo‘shimchalariga nisbatan zid ma’nolidir.
Bunday qo‘shimchalarni ikki guruhga bo‘lish mumkin: biror belgi-xususiyatga, shakl-shamoyilga yoki rang-tusga egalikni bildiruvchi qo‘shimchalar (-li, bo-, ser-, ba-, -dor; shunday belgiga ega emaslikni ifodalovchi qo‘shimchalar (-siz, be-, no-).
Masalan:
badavlat - davlatsiz
shirador - beshira, shirasiz
sero‘t - o‘tsiz
baobro‘ - beobro‘, obro‘siz
ko‘ngilli - ko‘ngilsiz
Qo‘shimchalar shakldoshligi, ma’nodoshligi va zid ma’noliligi nutqni ko‘rkam qiladi, tilning ifoda imkoniyatlarini kengaytiradi, uning uslubiy jihatdan rang-barang bo‘lishini ta ‘minlaydi, ta’sirchanligini oshiradi.
Nutqda bir asosli so‘zlardan foydalanish
Tildagi so‘zlar yangi paydo bo‘lgan so‘zlar hisobigagina emas, balki oldindan muomala-munosabatda mavjud bo‘lib kelgan so‘z asosida yangi leksemalarni hosil qilish yo‘li bilan ko‘payib boradi. Bitta asos vositasida bir nechta yangi so‘z yasalishi mumkin: suvli, sersuv, suvsizlik.
Bir asosli so‘zlarga asosdosh so‘zlar deyiladi.
Namunalar: tinch, tinim, tinimsiz, notinch, notinchlik; gulli, guldor, gulchi, gulchilik, sergul; shoxli, shoxdor, shoxsimon, sershox; obro‘li, obro‘siz, baobro‘, beobro‘ va h.k.