Бухоро давлат университети илм ва эзгулик бухоро – 2016

ЭЗГУЛИККА ДАЪВАТ


Ф. Р. Рўзиқулов,
Навоий вилояти халқ таълими ходимларини қайта тайёрлаш ва уларнинг малакасини ошириш институти ректори, психология фанлари номзоди, доцент

Ҳурматли устоз Шариф Рамазонович Сизни босиб ўтаётган ҳаёт йўлингиз, илмий ижодингиз Ўзбекистон психологлари учун ибрат ва намуна мактаби бўлиб хизмат қилмоқда. Мен Сизнинг илмий педагогик фаолиятингиз билан 1985 йилдан буён танишман. Дастлаб республикамизда чоп этилиб келинаётган Халқ таълими, Бошланғич таълим, Мактабгача таълим журналлари саҳифаларида психология фанларига оид илмий мақолаларингизни кейинчалик ўқув қўлланма, дарсликларингизни кўплаб ўқиганман ва ҳозир ҳам педагогик фаолиятимда фойдаланаман. Айниқса, Сизнинг мамлакатимиздаги халқ таълими тизимида психологик хизматни ташкил этиш бўйича олиб борган ташкилотчилик ишларингиз ҳозиргача ҳам кенг жамоатчиликнинг диққат эътиборида.

Мен ўша пайтларда Навоий Давлат педагогика институтининг психология кафедрасида ишлаб, Сиз бошлаган ишларни ўрганиш мақсадида Бухоро шаҳрига бориб сиз билан танишган эдим. Шундан сўнг, устозингиз доцент Х.Бобомирзаев билан маслаҳатлашиб биз ҳам институт қошида “Амалиётчи психологлар” тайёрлов курсини очишга вазирликнинг рухсатини олдик. Сиз ўша йиллари бизнинг институтда ҳам келиб ушбу курсда ўқитиладиган фан дастурларини, ўқув режа ва ишчи ўқув режаларини тузишда амалий ёрдам бериб шу билан бирга умумий, ёш ва педагогик психология, этнопсихология ва ижтимоий психология фанларидан маъруза ва амалий машғулотларни олиб борардингиз.
Устоз, Сизнинг раҳбарлигингизда Бухоро Давлат университети қошида “Психология” журнали ташкил этилди. Бугунги кунда журналда нафақат ўзбек психологлари, балки чет эл психолог олимлари томонидан тайёрланган илмий мақолалар чоп этилиб, республика ва халқаро миқёсда психология фанига оид билим ва тажрибалардан хабардор қилиб келмоқда. Журналнинг 5 ёш, Бухоро Давлат университетининг 85 ёшлик туйи муносабати билан ўтказилаётган халқаро илмий симпозиумда ҳам бевосита сизнинг хизматингиз чексиз.
Бугун ҳам Навоий вилоят халқ таълими ходимларини қайта тайёрлаш ва уларнинг малакасини ошириш институти профессор-ўқитувчилари билан ҳамкорликда умумий ўрта таълим мактабларида, мактабгача таълим муассасаларида ишлаётган амалиётчи психологларнинг билим, кўникма ва малакаларини оширишдаги амалий, услубий ёрдам бўлиб хизмат қилиб келмоқда.
Шариф Рамазанович! Сизни таваллуд топган кунингиз, яъни 55 ёшингиз билан чин кўнгилдан ўзим ва институтимиз профессор-ўқитувчилари номидан табриклайман. Сизга соғлик, омонлик, бахту саодат тилаймиз. Ватанимизнинг ижтимоий-иқтисодий тараққиёти йўлида ўзбек психологиясининг келажакдаги ютуқларини янада ривожланишида Сизга омад, бахт, улкан ютуқлар ёр бўлсин. Мендай шогирдларингиз бахтига ҳамиша саломот бўлинг.