Бухгалтерия ҳисобининг халқаро стандарти 1

Фаолиятнинг узлуксизлиги
25 Молиявий ҳисоботларни тайёрлаш пайтида, раҳбарият тадбиркорлик субъекти фаолиятини узлуксиз давом этиши қобилиятини баҳолаши лозим. Қачонки раҳбарият тадбиркорлик субъектининг фаолиятини тугатишни ёки савдони тўхтатишни мўлжаллаётган бўлмаса ёки бундай чораларни амалга оширишдан бошқа амалий муқобил чоралар мавжуд бўлмаган ҳолат юзага келмаса, тадбиркорлик субъекти молиявий ҳисоботларни фаолиятнинг узлуксизлиги асосида тайёрлаши лозим. Агар раҳбарият, баҳолашни амалга ошираётганда, тадбиркорлик субъекти фаолиятини узлуксиз давом этиши қобилияти тўғрисида аҳамиятли шубҳа тўғдириши мумкин бўлган ҳодисалар ёки шароитларга тегишли муҳим ноаниқликлардан хабардор бўлса, тадбиркорлик субъекти ушбу ноаниқликларни очиб бериши лозим. Агар тадбиркорлик субъекти молиявий ҳисоботларни фаолиятнинг узлуксизлиги асосида тайёрламаса, у ушбу фактни, молиявий ҳисоботлар қайси асосда тайёрланганлигини ҳамда тадбиркорлик субъекти фаолиятнинг узлуксизлигини таъминлай олмайди деб ҳисобланишининг сабаби билан бирга, очиб бериши лозим.
26 Фаолиятнинг узлуксизлиги тўғрисидаги фараз тўғри эканлигини баҳолашда, раҳбарият ҳисобот даври охиридан кейин, камида , ўн икки ойни қамраб олган, аммо бу билан чекланмаган келажакка оид барча мавжуд маълумотларни инобатга олади. Уларни таҳлил қилиш даражаси ҳар бир ҳолатдаги фактларга боғлиқ бўлади. Агар тадбиркорлик субъектининг фаолияти ўтмишда фойда келтирадиган бўлган бўлса ва молиявий ресурсларни осонлик билан олиш имкониятлари бўлса, тадбиркорлик субъекти батафсил таҳлилсиз ҳам бухгалтерия ҳисоби фаолиятнинг узлуксизлиги асосида юритиш тўғри деб хулоса қилиши мумкин. Бошқа ҳолатларда, раҳбарият ҳисобни фаолиятнинг узлуксизлиги асосида юритиш тўғри деб ўзини қаноатлантира олишидан олдин, у жорий ва кутиладиган фойдалиликка тегишли кенг кўламдаги омилларни, қарзни тўлаш графикларини ҳамда мавжуд молиялаштришнинг ўрнига ишлатилиши мумкин бўлган молиялаштиришнинг потенциал манбаларини кўриб чиқиши зарур бўлиши мумкин.
Бухгалтерия ҳисобининг ҳисоблаш усули
27 Тадбиркорлик субъекти ўзининг, пул оқимлари тўғрисидаги маълумотларидан ташқари, молиявий ҳисоботларини бухгалтерия ҳисобининг ҳисоблаш усули асосида тайёрлаши лозим.
28 Бухгалтерия ҳисобининг ҳисоблаш усули қўлланилганда, тадбиркорлик субъекти моддаларни активлар, мажбуриятлар, капитал, даромадлар ва харажатлар (молиявий ҳисоботлар элементларини) сифатида тан олади, қачонки улар Концептуал асосда келтирилган ушбу элементларнинг таърифларига ва тан олиш мезонларига тўғри келса.⁴