Bugungi kunda dunyo miqiyosida oziq-ovqatga bo‘lgan ehtiyojning ortib borishi, ichki suv havzalari biologik potensialidan, jumladan, baliq resurslaridan oqilona foydalanishni taqozo etmoqda

Ishning ilmiy va amaliy ahamiyati. Tabiiy va sun’iy suv havzalarida mavjud sanoat ahamiyatiga ega va sanoat ahamiyatiga ega bo‘lmagan baliqlar faunasini o‘rganish nafaqat nazariy balki amaliy ahamiyat ham kasb etadi. Suv havzalarimizdagi baliqlar faunasining kelib chiqishi, uning antropogen omil ta’sirida o‘zgarishi, rivojlanishi va baliqchilikdagi ahamiyatini aniqlash regionda baliqchilikni rivojlantirishga yordam beradi. Respublikamiz suv havzalarida hozirgi paytda 74 ta atrofida baliq turlari mavjud bo‘lsa, shundan 12 oilaga mansub 47 baliq turi Farg‘ona vodiysining turli tipdagi suv havzalarida yashaydi. Shundan 23 turi (48%) ov ahamiyatiga ega baliqlar bo‘lsa, qolgan 24 turi (52%) kam ahamiyatli yoki hashaki baliqlar hisoblanadi. Aynan ov ahamiyatiga ega baliq turlari ichidan 9-10 turi tijorat maqsadlarida ovlanadi xolos. Qolganlari esa suv havzalarda kam miqdorni tashkil etadi yoki “Qizil Kitob”ga kiritilgan turlar sanaladi.
Yuqoridagilardan kelib chiqib biz olib borayotgan tadqiqot ishi ya’ni tabiiy va sun’iy suv havzalarida tarqalgan sanoat ahamiyatiga ega bo‘lmagan baliqlarning bioekologik xususiyatlarini o‘rganish umumbiologik muammolarni hal qilishda hamda regionda baliqchilikni rivojlantirishning ilmiy asoslarini ishlab chiqishda amaliy ahamiyatga ega deb hisoblaymiz.
Tadqiqotning asosiy masalalari va farazlari:
- Tabiiy va sun’iy suv havzalarining gidrologik va gidrografik ta’rifi o‘rganiladi;
- Tabiiy va sun’iy suv havzalaridagi sanoat ahamiyatiga ega baliqlarning tarqalishi va shakllanishi o‘rganiladi;
- Tabiiy va sun’iy suv havzalaridagi sanoat ahamiyatiga ega bo‘lmagan baliqlarning tarqalishi va shakllanishi o‘rganiladi;
- Daryo, ko‘l va suv omborlarida tarqalgan sanoat ahamiyatiga ega bo‘lmagan baliqlarning bioekologik xususiyatlari va ularning baliqchilikdagi ahamiyati aniqlanadi;
- Baliqchilik xo‘jaliklari hovuzlarida tarqalgan sanoat ahamiyatiga ega bo‘lmagan baliqlarning bioekologik xususiyatlari va ularning baliqchilikdagi ahamiyati aniqlanadi.