Bugungi kunda dunyo miqiyosida oziq-ovqatga bo‘lgan ehtiyojning ortib borishi, ichki suv havzalari biologik potensialidan, jumladan, baliq resurslaridan oqilona foydalanishni taqozo etmoqda

Ishning maqsadi va vazifasi: Tadqiqot ishimizdan ko‘zlangan maqsad tabiiy va sun’iy suv havzalarida tarqalgan sanoat ahamiyatiga ega bo‘lmagan baliqlarning bioekologik xususiyatlari va ularning baliqchilikdagi ahamiyati, ya’ni ushbu suv havzalari ixtiofaunasining kelib chiqishi, rivojlanishi va uning antropogen omil ta’sirida o‘zgarishini hamda baliqlarning bioekologik xususiyatlarini o‘rganishdir. Bundan tashqari turli yillar davomida iqlimlashtirilgan yoki tasodifan kelib qolgan, so‘ngra tabiiy va sun’iy suv havzalarimizda keng tarqalgan, lekin sanoat ahamiyatiga ega bo‘lmagan baliqlarning bioekologik xususiyatlarini o‘rganish ham tadqiqot ishlarimizning bir qismiga kiradi.
Ishning ob’ekti va predmeti: Tabiiy va sun’iy suv havzalarida tarqalgan baliqlar faunasi, mahalliy va introduksiya qilingan sanoat ahamiyatiga ega bo‘lmagan baliqlarning quyidagi bioekologik ko‘rsatkichlari: yoshi, o‘sish tezligi, og‘irligi, mutlaq individual mahsuldorlik, nisbiy mahsuldorlik, potensial mahsuldorlik, ikralarining o‘lchami, ushbu ko‘rsatkichlarning o‘zaro korrelyasiyasi hamda suv havzalaridagi sanoat ahamiyatiga ega va sanoat ahamiyatiga ega bo‘lmagan baliqlarning o‘zaro nisbati, ularning baliqchilikdagi ahamiyati ishning ob’ekti va o‘rganish predmeti hisoblanadi.
Ishning ilmiy yangiligi: Respublikamizning turli regionlaridagi suv havzalari ixtiofaunasining shakllanishi, rivojlanishi va ularning bioekologik xususiyatlarini o‘rganish maqsadida ko‘plab ilmiy-tadqiqot ishlari olib borilgan. Lekin aynan tabiiy va sun’iy suv havzalaridagi sanoat ahamiyatiga ega bo‘lmagan baliqlar faunasining kelib chiqishi, shakllanishi, ularning rivojlanishi va bioekologik xususiyatlarini o‘rganishga qaratilgan kompleks ishlar amalga oshirilmagan. Bulardan tashqari ushbu tadqiqot ishida Farg‘ona vodiysi tabiiy va sun’iy suv havzalaridagi sanoat ahamiyatiga ega va sanoat ahamiyatiga ega bo‘lmagan baliqlarning o‘zaro nisbati tahlil qilindi hamda regionda baliqchilikni rivojlantirish bo‘yicha amaliy takliflar berildi.