Аxborot xavfsizligi tizimi davlatning axborot sohasidagi siyosatini mamlakatda milliy xavfsizlikni taʼminlash davlat siyosati bilan chambarchas bog‘laydi. Bunda axborot xavfsizligi tizimi davlat siyosatining asosiy yo‘nalishlaridan biri hisoblanadi. Bu esa axborot xavfsizligining roli va uning mamlakat milliy xavfsizligi tizimidagi oʼrnini belgilaydi. Аxborot sohasidagi O‘zbekistonning milliy manfaatlarini, ularga erishishning strategik yo‘nalishlarini hamda amalga oshirish tizimlarini oʼzida aks ettiruvchi maqsadlar bir butunlikda davlat axborot siyosatini anglatadi. Shu bilan birga, davlat axborot siyosati mamlakatning tashqi va ichki siyosatining asosiy tashkil etuvchisi hisoblanadi va jamiyatning barcha jabhalarini qamrab oladi. Ushbu yo‘nalishda tizim xavfsizligini taʼminlashning aniq mexanizmlarini belgilash qabul qilingan xavfsizlik siyosatiga muvofiq amalga oshirishni talab etadi. Аxborot xavfsizligi strategiyasi axborot xavfsizligi konsepsiyasi asosida ishlab chiqilishi lozim. Аxborot xavfsizligi boʼyicha tadbirlar kompleksining asosini axborot himoyasining strategiyasi tashkil etishi maqsadga muvofiq hisoblanadi. Bugungi kunda O‘zbekistonda axborot xavfsizligi konsepsiyasining qabul qilinmaganligi, yaʼni axborot xavfsizligini taʼminlovchi maqsadlar, vazifalar, tamoyillar va asosiy yo‘nalishlar boʼyicha rasmiy nuqtai-nazar majmuining mavjud emasligiga, axborot sohasida yagona davlat siyosatining belgilanmaganligiga, mazkur sohadagi mutassaddi tashkilotlar, axborot xavfsizligini taʼminlashda bilvosita ishtirok etuvchi tashkilotlar, shuningdek, xo‘jalik yurituvchi subektlar tomonidan xavfsizlikni taʼminlash bo‘yicha turlicha yondashuvlariga olib kelmoqda. Mavjud maʼlumotlar tahlili, rivojlangan mamlakatlar hamda mintaqamizdagi qo‘shni davlatlar tajribasi axborot sohasidagi shaxs, jamiyat va davlatning axborot xavfsizligi borasidagi hayotiy muhim manfaatlarini taʼminlash hamda barcha qonunchilik hujjatlarini oʼzida mujassam etgan yagona “Аxborot xavfsizlik Konsepsiyasi”ni qabul qilganliklarini ko‘rsatmoqda. Mamlakatimizda bugungi kunga sohadagi munosabatlarni tartibga solish hamda maqsadida yigirmadan ortiq qonunchilik hujjatlari yaratilgan bo‘lishiga qaramasdan, ular yagona tizimga solinmagan1.
Jumladan O‘zbekiston Respublikasida yagona axborot siyosati konsepsiyasini tasdiqlash to‘g‘risidagi 2019-yil ID-8050 sonli qarori qabul qilinib ustuvor vazifalar belgilab berilganligiga qaramasdan ushbu konsepsiyani ishlab chiqish va amaliyotga tadbiq etish ishlari haligacha yakunlanmagan. Shuningdek, ayni paytlarda Oliy Majlis Senatiga kiritilgan “Kiberxavfsizlik to‘g‘risida” gi qonunning hali qabul qilinmaganligini misol qilib aytib o‘tish mumkin.
Shuningdek O‘zbekiston Respublikasi axborot xavfsizligi konsepsiyasini ishlab chiqish jarayoni hali ham tugallanmagan. Qonunchilikdagi kamchiliklardan yana biri Shaxsga doir ma’lumotlar to‘g‘risidagi qonunning 27-moddasining amaliyotga tadbiq etilishi mamlakatimiz hududida ijtimoiy tarmoqlar va raqamli istisodiyot bilan shug‘ullanuvchi xorijiy kompaniyalarning davlatimiz hududida fuqarolarimizning shaxsiy ma’lumotlarini saqlamasliklari natijasida ular o‘z faoliyatini to‘xtatishi yoki bloklanishi bilan bog‘liq muammolarni keltirib chiqarmoqda. Shuningdek, shaxsga doir ma’lumotlar bilan ishlashda fuqarolarning huquqiy savodxonligining pastligi natijasida ularning ma’lumotlari davlatimiz hududidan tashqarida saqlanishiga va har-xil mobil ilovalar va ijtimoiy tarmoqlardan foydalanishda o‘zlarining ma’lumotlarini hech ikkilanmasdan o‘z qo‘llari bilan ushbu platformalarga topshirib qo‘yayotganligi axborot suverenitetining ta’minlanishida katta to‘siq hisoblanadi. Bunday ma’lumotlardan buzg‘unchi maqsadlarda foydalanish, yoki shaxsni obro‘sizlantirish maqsadida foydalanish bugungi global axborot makonida keng qo‘llanilmoqda. Bundan tashqari ushbu qonun davlat va ushbu platformalar o‘rtasidagi hamkorlikning rivojlanishiga to‘sqinlik qilmoqda. Natijada internetda amalga oshirilayotgan virtual jinoyatlarga qarshi kurashishda xavfsizlik tizimlarining faoliyatida juda ko‘p muammolar paydo bo‘lmoqda.
