Buca senza tatta!!! „ Aschia creiel jeu che nus anflein mai in termin communabel per festivar ensemen Nadal quest`onn!”

Buca senza tatta!!!
„ Aschia creiel jeu che nus anflein mai in termin communabel per festivar ensemen Nadal quest`onn!”

“ Ti eis gie quella che sa buca mintga sera, ina sera meis vus a baselgia, l`autra sera essas vus envidai tier ti`amitga a tscheina,... . Lu laschein nus ei semplamein per quest onn e tat ed jeu festivein persuls Nadal. Quei ei gie forsa aschia ni aschia meglier, aschiglioc veis vus aunc l`impressiun che nus controlleschien vus aunc da Nadalsera!!”

Detg e fatg. Suenter ina hazra dispetta denter la mumma e la tatta han tuttas duas decidiu ch`ei seigi meglier sch`ei festiveschien uonn Nadal dapersei.

Normalmein mava la famiglia suenter messa aunc orasi tier la tatta e festivavan leu ensemen Nadal. Uonn dueva quei per l`emprema ga esser auter. Bab e mumma havevan sediscurriu ed eran sedecidi da dir nuot a lur treis affons. Els eran dil meini che cunzun la pintga Anica savessi haver da morder cun quella decisiun ed els levan tonaton buca tartignar alla feglia giuvna che mava gest il secund onn a scola la sera da Nadal.

Aschia ei la Serasontga arrivada e l`entira famiglia Caflosch che selegrava silla producziun dils scolars ella baselgia e sin in`emperneivla sera da Nadal. La mattascha mesauna che mava ella sisavla classa ha sunau in toc cun sia flauta da pan. Quei ha tunau bellezia. Ed era la producziun dils affons ha fatg grond plascher a pign e grond. Cun in bien giavisch sin viadi ha il plevon allura terminau la messa da Nadal ed Anica ha pigliau pil maun alla mumma ed ei sortida dalla baselgia. “ Donn che tatta e tat pon buca pli far quei liung viadi tochen giu en baselgia, nies teater havess segiramein plaschiu ad els” di Anica cun vusch fetg tresta. “ Tgei cletg mein nus ussa si tier els a festivar ensemen Nadal!” Cheu ha la mumma giu da laguoter ina ni duas ga da vid avon che rispunder ad Anica. “Sas Anica, uonn havein la tatta ed jeu decidiu da festivar mintgin Nadal per sesez, quei liung viadi tochen si egl uaul ei semplamein memia bia per nus aunc suenter la messa. Suenter che nus havein envidau il pigniel sas ti gie telefonar ad ella e giavischar ina legreivla sera da Nadal.” Cun quels plaids ha la mumma giu declarau cuort e bein tgei che schabegi uonn da Nadalsera. Anica ha schau sentir ch`ella era tresta e sevilau sc`in rustg. Mo suenter entginas emprovas da surmenar ils geniturs ha Anica sentiu ch`ei haveva negin senn. Sias duas soras pli veglias Corine ed Ariane han buca fatg grondas enzennas aschia che Anica ha era stuiu acceptar quella decisiun.

L`entira famiglia ei turnada a casa e vegnend en da stiva han ils affons viu ils regals ch`il bambin haveva purtau ad els. Il bab catscha la spina da contact ella bescla ed il pigniel glischa. Suenter tschenta el en la casetta da Nadal cun renomadas canzuns romontschas ferton che las duas mattatschas veglias sefan immediatamein vid ils schenghetgs. Tut fascinai dil scooter da Corine, dalla nov`aissa dad Ariane e dil dc-rom dil bab va la pintg`Anica per in mument tut en emblidonza. Essend tut ils quater “carschi” chignai vid il computer per admirar il niev dc-rom dil bab seretila Anica onn zuler, trai en ina giacca caulda e semetta sin viadi encunter la casa da sia tatta. Anica haveva ponderau bein tgei ch`ella drovi per quei viadi ed ella envida la cazzola da sac essend ella entgins meters ord il vitg. Dil vitg anora dev`ei numnadamein mo in pign trutg per arrivar tier la tatta. Cura ch`ella ei arrivada sill`acla migeivla, quei ei in bi englar avon il stgir uaul pren ella neuado il natel da sia sora veglia e telefonescha alla tatta.” Gie hallo tatta cheu ei l`Anica. Ti, savesses ti aunc preparar enzatgei tscheina per nus, nus havein tuttina aunc midau meini, senza vus dus eisi tonaton buca il medem.” “Gie secapescha mo cu vegnis?” “Nus semettein immediat sin via, pia circa en treis quarts ura!! Tochen pli tard.” Ussa haveva Anica pustau la tscheina tier la tatta. Aschia stueva ella mo aunc perschuader ses geniturs e sias soras da vegnir neuasi. “ Jeu scrivel semplamein in SMS e lu san els buca cuntergir, patratga Anica. Aschia scriva ella: MES CARS, NADAL EI BUCA NADAL SENZA TATTA! SCHE VUS LEIS ERA VEGNIR SAVEIS NUA CH`ELLA STAT! CARS SALIDS ANICA! Suenter quella communicaziun cuorta ha Anica tschentau ora il natel e cuntinuau siu viadi. Cun pass decisiv marschava la giuvnetta encunter Stegls, aschia senumna il liug nua che la tatta ed il tat habiteschan. In quart ura pli tard ha Anica tuttenina udiu ina vusch a clamond:” Anica, Anica “ Ella enconuscheva la vusch dalla tatta. “Tgei fas ti cheu ha Anica clamau tut orda senn, ti stuesses gie mirar dil tat e praparar la tscheina enstagl da far spassegiadas da glina pleina.” “Mia cara, tes geniturs han telefonau a mi tut desperrai e plein tema, ei havess gie saviu schabegiar enzatgei cun tei!!” Tut per sesez marmugna l`Anica:” Ah, quei havevel jeu naturalmein schon calculau, denton havess tatta astgau haver in tec dapli cunfidonza en mias habilitads. Deplorablamein ha era tatta fatg tals quitaus, quei level jeu en sesez buca.” “ Perduna tatta, ch`jeu haiel provoccau talas circumstanzias, mo sas, Nadal senza tei ei semplamein buca Nadal!”