Bu muqaddas Vatanda azizdir inson

Bu muqaddas Vatanda azizdir inson

O‘zbekiston Respublikasida barcha fuqarolarbir xil huquq va erkinliklarga ega bo‘lib,jinsi, irqi, millati, tili, dini, ijtimoiy kelib chiqishi, e’tiqodi, shaxsi va ijtimoiy mavqeidan qat’i nazar, qonun oldida tengdirlar. (O‘zbekiston Respublikasining Konstitutsiyasi, 18-modda)

Osmoni musaffo, tinch va osuda, odamlari shukronalik, hayotdan mamnuniyat tuyg‘usi bilan yashayotgan mamlakatda taraqqiyot bo‘ladi, xalq bunyodkorlik, yaratuvchanlik ishlari bilan band bo‘ladi, turmushiga fayzu baraka inadi.

Prezidentimiz Islom Karimov rahnamoligida mamlakatimizda millatlararo va diniy konfessiyalararo ahillikning ta’minlangani, jamiyatimizda bag‘rikenglik va mehr-muruvvat muhiti qaror topgani barcha sohalardagi yutuqlarimizda muhim omil bo‘lmoqda. Millati, ijtimoiy holati, diniy e’tiqodidan qatyi nazar, barcha fuqarolarning huquq va manfaatlarini ta’minlash, ularning ta’lim olishi, kasb-hunar egallashi, salomatligini mustahkamlashi, iste’dodini yuzaga chiqarishi, mehnat qilishi, munosib hayot kechirishi O‘zbekiston Respublikasi Konstitutsiyasida kafolatlangan.

Bugun mamlakatimizda bir yuz o‘ttizdan ortiq millat va elat, ko‘plab diniy konfessiya vakillari yagona oila farzandlaridek ahillikda yashamoqda, yagona Vatanimiz – O‘zbekiston taraqqiyotiga hissa qo‘shmoqda. Maktablarimizda yetti tilda ta’lim berilayotgani, ommaviy axborot vositalarining o‘ndan ortiq tillarda faoliyat ko‘rsatayotgani Asosiy Qonunimizda mustahkamlangan tamoyillarning izchillik bilan amalga tatbiq etilayotganidan dalolatdir.

Davlatimiz rahbarining tashabbusi bilan 1992 yilda Respublika Baynalmilal madaniyat markazining tashkil etilishi o‘zbekona bag‘rikenglik va mamlakatimizda demokratik tamoyillar mustahkam qaror topishining yorqin ifodasi bo‘ldi. Xalqimiz, ayniqsa, yoshlar ma’naviyatini yuksaltirish, ularni Vatanga muhabbat, milliy istiqlol g‘oyalariga sadoqat, millatlar va dinlararo bag‘rikenglik ruhida tarbiyalash, diyorimizda istiqomat qilayotgan turli xalqlar va elatlarning an’ana va urf-odatlarini asrab-avaylash, ularni yanada rivojlantirishga ko‘maklashish mazkur jamoat tashkiloti faoliyatida ustuvorlik kasb etadi. Ayni paytda Respublika Baynalmilal madaniyat markazi barcha milliy madaniy markazlar faoliyatini muvofiqlashtirib, ularga tashkiliy va metodik yordam ko‘rsatmoqda.

Markaz tomonidan muntazam o‘tkazilayotgan ilmiy-amaliy anjumanlar millatlararo munosabatlarning yanada rivojlanishi, turli millatlarning milliy qadriyatlarini asrab-avaylashga xizmat qilayotir. “O‘zbekiston – umumiy uyimiz!”, “Shu aziz Vatan – barchamizniki!”, “Bu muqaddas Vatanda azizdir inson!” mavzuidagi do‘stlik festivallari, ijodiy-ma’rifiy loyihalar, konsertlar, ko‘rgazmalar millatlar o‘rtasidagi totuvlik, ahillikni mustahkamlashga xizmat qilmoqda. Bu jarayonda istiqlol yillarida yurtimizda qo‘lga kiritilayotgan yutuqlar keng targ‘ib etilib, milliy va umumbashariy qadriyatlarning mazmun-mohiyati yoshlar qalbi va ongiga chuqur yetkazilmoqda.
– Markazimizda o‘zbek va koreys xalqlarining urf-odatlari, madaniyati, tarixini o‘rganishga oid ma’rifiy kurslar muntazam faoliyat olib bormoqda, – deydi Koreys milliy madaniyat markazi rahbari Nikolay Kim. – Yaqinda o‘zbek tilini o‘rganish bo‘yicha o‘quv kursi tashkil etdik. Koreys xalqining musiqasi va raqs san’atidan bahramand etishda, madaniyatlararo muloqotni o‘rnatish va kengaytirishda “Koryo” ashula va raqs ansamblining hissasi katta bo‘layotir.”Eng namunali oila” ko‘rik-tanlovi, koreys xalqining tarixi, bolalar badiiy ijodiyotiga oid ko‘rgazmalar barcha hamyurtlarimizga manzur bo‘ldi. Bularning barchasi Prezidentimiz Islom Karimov rahnamoligida millatlar o‘rtasidagi totuvlikni, hamjihatlikni ta’minlash bo‘yicha olib borilayotgan siyosat naqadar to‘g‘ri ekanligining dalolatidir.

Viktoriya Ternovix – Polyak milliy madaniyat markazi qoshidagi “Bavelnyanki” folklor ansambli xonandasi.

– O‘zbekistonda tug‘ilib, voyaga yetganim – eng katta baxtim, – deydi Viktoriya. – Mamlakatimizda yoshlarning qobiliyatini yuzaga chiqarish, ularni har jihatdan qo‘llab-quvvatlash, yangi marralar sari ruhlantirishga qaratilayotgan e’tibor asosan yoshlardan tarkib topgan ansamblimiz faoliyatida ham namoyon bo‘layotir. Ijodiy jamoamiz turli festivallar, ko‘rik-tanlovlar, konsertlarda faol ishtirok etmoqda. Uning faoliyat ko‘rsatishi uchun zarur sharoit va imkoniyatlar yaratilgan. Bularni qadrlamoq, mamlakatimizdagi tinchlik, osoyishtalik, hamjihatlikni ko‘z qorachig‘idek asrab-avaylamoq – burchimizdir.

Ha, O‘zbekiston o‘zi tanlagan taraqqiyot yo‘lidan og‘ishmay dadil odimlamoqda. Xalqimiz ko‘zlangan maqsadlarga yetishida Konstitutsiyamizda belgilangan tamoyillar, mamlakatimizdagi tinch va osoyishta, farovon hayot, hamyurtlarimizning ertangi kunga bo‘lgan qat’iy ishonchi, jamiyatimizdagi do‘stlik, hamjihatlik, ahillik, mehr-oqibat muhiti mustahkam asos bo‘lmoqda.