Boshqaruvning: mohiyati, ahamiyati, zaruriyati, maqsadi va vazifalari nimalardan iborat?

Topshiriq

1. 
   Boshqaruvning: mohiyati, ahamiyati, zaruriyati, maqsadi va vazifalari nimalardan iborat?
   
2. 
   Boshqaruvning bozor iqtisodiyoti sharoitiga mos va xos tamoyillari va usullari-chi?
   
3. 
   Korxona boshqaruvi hozir ahvoli qanday?
   
4. 
   Boshqaruvning istiqboli hamda uni iqtisodiy o‘sish va ishlab chiqarish samaradorligini oshirishga yo‘naltirish nimalarni taqazo etadi?
   
5. 
   Boshqaruvda xorijiy mamlakatlar tajribasi va undan keng foydalanish nima uchunzarur?
   

Boshqaruv jamiyat munosabatlarining muhim ko’rsatkichi sifatida jamiyat hayotining barcha jabhalariga tegishlidir. U insonning jamiyatdagi mohiyati, mehnati taqsimoti, kooperasiya va muomala zarurati, iqtisodiy, ijtimoiy va siyosiy munosabatlardan kelib chiqadi. Boshqaruvsiz tabiatni o’zgartirish, mehnat qurollari va predmetlarini yagona ishlab chiqarish jarayonida birlashtirishga yo’naltirilgan faoliyat yuritishning iloji yo’q. Boshqacha qilib aytganda, boshqaruv ishlab chiqarishning barcha qatnashchilari va elementlari o’rtasida kelishuvni yo’lga qo’yib, yuzaga kelgan munosabatlarning mazmuni va me’yorini tartibga soladi hamda resurslardan foydalanishning samarali yo’llarini topishga o’z hissasini qo’shadi. Boshqaruvning mohiyati va obyektiv zaruriyatini yanada osonroq va tezroq tushunish uchun adabiyotda mashhur bo’lgan misol - orkestr va dirijerga murojaat qilish lozim. Orkestr va dirijerning o’zaro aloqasini ilg’ab olish uchun musiqiy qobiliyat talab qilinmaydi. Konsert tomoshalarida bo’lgan har bir kishi dirijerning sahnada paydo bo’lish chog’ini ko’rgan, albatta. Orkestr tomon o’girilgach, dirijer tayoqchasini ko’taradi va musiqachilar musiqa chalishni boshlaydilar. Shunga o’xshash holat boshqaruvda ham ro’y beradi - yo’lga qo’yilgan tashkilotchilik tizimi boshqaruv komandalari asosida ishlaydi. Bundan kelib chiqqan holda boshqaruv - ijtimoiy mehnat jarayoniga ishlab chiqarish rivojlanishining obyektiv qonunlari asosida yo’naltirilgan tarzda ta’sir o’tkazish tizimi, har bir ishchining va butun jamoaning mehnatini bir vaqtning o’zida nazorat qilish, motivasiya va tartibga solish usulidir. Moddiy boyliklar va ne’matlar hamda ularga tenglashtirilgan qadriyatlarni taqsimlash, iste’mol qilish va ayirboshlash ham boshqaruvni talab qiladi.

Hozirgi paytda, iqtisodiy va ilmiy-texnik o’zgarishlar davrida boshqaruv usullari, tamoyillari va texnikasida sezilarli o’zgarishlar ro’y bermoqda. Boshqaruv alohida tizim sifatida tobora ko’proq tajriba almashish sohasi, reklama, ishlab chiqarish vazifalarini tezkor hal qilish vositasi bo’lib bormoqda. Bunga esa boshqaruvni professionallashtirish, biznes va tadbirkorlik maktablari hamda maslahat markazlarining ochilishi sabab bo’lmoqda.
Ma’muriy-buyruqbozlik tizimi borgan sari xo’jalik yuritishning iqtisodiy usullariga asoslangan boshqaruv tizimiga o’rnini bo’shatib bermoqda. Boshqaruvga yondashishdagi zamonaviy usullarning muhim ahamiyati inson omilini faollashtirish, o’z-o’zini boshqarish va tashabbuskorlikni rivojlantirish, bozor iqtisodiyoti talablariga javob beruvchi yangi tashkiliy tuzilmalarni yaratishda namoyon bo’ladi. Ma’lumki, o’z korxonasi yoki sexida, o’z ish yoki xizmat joyining “xo’jayini” bo’lmay turib iqtisodiyotning har tomonlama rivojlanishini talab qilib bo’lmaydi.
Insoniyat hayotida shu narsa isbotlab berilganki, moddiy to’kin-sochinlik o’zidan-o’zi paydo bo’lmaydi, uni mehnat faoliyati va oqilona boshqaruv yordamida yuzaga keltirish mumin. Bu holatni aniq tushunish va unga to’g’ri baho berish zamonaviy menedjmentni boshqaruv to’g’risidagi fan sifatida qabul qilishni asoslab beradi. Mehnat taqsimoti va uning ijtimoiy tavsifini kuchaytirishda boshqaruvni, mustaqil faoliyat shaklida alohida ajratib ko’rsatish mumkin. Bundan korxonalar va xalq xo’jaligi miqyosida maxsus boshqaruv tizimlarining vujudga kelishi va faoliyat yuritishiga obyektiv zaruriyat kelib chiqadi. Bunday tizim o’zining gorizontal va vertikal aloqalari bilan birga fan-texnika taraqqiyoti va ishlab chiqarish kuchlarining rivojlanishi, shuningdek, siyosiy kayfiyatlar va ishlab chiqarish munosabatlaridagi o’zgarishlar ta’siri ostida doimiy harakatda va yangilanishda bo’ladi. Shu sababli, boshqaruvni baholash va tahlil qilish jarayonida, biz xalq xo’jaligi rivojlanishining har bir tarixiy bosqichida shakllanuvchi boshqaruv tizimini o’rganamiz.
Boshqaruv tizimi deganda nimani tushunish lozim? Agar jamiyatning butun iqtisodiy tizimini oladigan bo’lsak, uning tarkibiga kiruvchi ko’plab kichik tizimlarni - tarmoqlar, korxonalar, birlashmalar va hokazolarni ko’rishimiz mumkin. Ularning har birini ikki jihatidan: mustaqil faoliyat yuritish nuqtai nazaridan yoki butun birlikning tarkibiy qismi sifatida ko’rib chiqish mumkin. Masalan, korxona (firma) mustaqil boshqaruv tizimi yoki tarmoqning (ishlab chiqarishning) bo’linmasi, bo’g’ini sifatida faoliyat yuritishi mumkin. Bunga bog’liq bo’lgan holda boshqaruv-ning tashkiliy tuzilmasi, uning vazifalari va funksiyalari shakllanti-riladi Amaliyotda shu narsa isbot qilinganki, boshqaruvning juda ham yirik tashkiliy strukturasi bozor iqtisodiyotida maqsadga muvofiq bo’lmaydi. U kutilgan natijalarni bermaslikdan tashqari, boshqaruv qarorlarini bajarishda muammolarning yuzaga kelishiga, boshqaruvning yakuniy maqsadini oraliq vazifalar bilan almashib ketish xavfi kuchayishiga olib keladi. O’zaro aloqada va ma’lum jihatdan bir-biriga bo’ysinuvchi bo’lgan boshqaruv obyektlari va subyektlari faoliyatning alohida ko’rinishi sifatida boshqaruvning muhim elementlari hisob-lanadi. Bu aloqani quyidagi tarzda chizma yordamida ko’rsatish mumkin:
Korxonada boshqaruvning ta’siri boshqaruv obyektiga yo’naltirilgan bo’lib, ishlab chiqarish va xo’jalik yuritish jarayonlari, ishab chiqarish uskunalarini ekspluatasiya qilish, turli miqyosdagi mehnat kooperasiyasi va hokazolar boshqaruv obyekti bo’lishi mumkin. Boshqaruv subyekti esa qoidaga ko’ra, korxona rahbari yoki boshqaruv obyektlarini maqsadli ravishda boshqarishni amalga oshiruvchi xizmat rahbarlaridir. Agar yuqorida keltirilgan misolga qaytadigan bo’lsak, orkestr, bu – boshqaruv obyekti, dirijer esa, boshqaruv subyektidir. Boshqaruv obyektlari va subyektlari doimo o’zaro aloqada bo’lib, bunda asosiy o’rin boshqaruv obyektiga, ya’ni boshqaruvchi tizimga ajratiladi. Boshqaruv obyektining mazmuni, unda yuz berayotgan o’zgarishlar boshqaruv subyekti vazifalari va harakatlarini belgilab beradi. Bu esa boshqaruv shakllari va usullarini mukammallashtirishda aks etadi. Albatta, bu boshqaruv subyektlarining passivligini anglatmaydi, aksincha, boshqaruv tizimining bo’limlari shu boshqaruv tizimining eng faol qismini tashkil etadi va tavsiflaydi.
Aynan boshqaruv subyekti ishlab chiqarish resurslari va asbob-uskunalardan foydalanish siyosatini belgilaydi, ishlab chiqarish vositalarining ishchi kuchi bilan birlashuviga ko’maklashadi. Ya’ni korxonaning nima, qachon, qayerda, kimga ishlab chiqarish bilan bog’liq bo’lgan siyosati, birinchi o’rinda boshqaruv subyekti tomonidan hal qilinadi. Shu sababli, boshqaruv obyektlari va subyektlari orasidagi aloqa, jumladan, ularning ichki tashkil qilinishi qanchalik mustahkam bo’lsa, bir xil sharoitlarda ishlab chiqarish hamda boshqaruv tizimining samaradorligi shunchalik yuqori bo’ladi. Boshqaruv faoliyati - boshqaruvchi shaxs yoki organ tomonidan boshqaruv amallarini bevosita va bilvosita komandalar (buyruq, tavsiya va ko’rsatmalar) shaklida ishlab chiqish va amalga oshirishdir.
Boshqaruv amallari ishlab chiqarish jarayonining yakunlanishi uchun moddiy shart-sharoit vazifasini bajaradi. Aytish mumkinki, boshqaruv amallari boshqaruv faoliyati va natijalari o’rtasidagi bog’lovchi bo’g’in bo’lib xizmat qiladi. Faoliyatning ushbu turi ahamiyati, aynan boshqaruv qarorlarini qabul qilish jarayonida korxonaning joriy va istiqboldagi siyosati shakllanishida namoyon bo’ladi. Shu jihatdan kadrlarni to’g’ri tanlash va joylashtirish, ularning malakasi, o’zlariga yuklatilgan vazifalarni to’g’ri tushunishlari ham muhim ahamiyatga egadir. Amaliyot shuni ko’rsatadiki, hozirgi boshqaruvchilar uchun yaxshi muhandis, texnolog, konstruktor bo’lishning o’zigina kamlik qilib, ishlab chiqarish iqtisodiyoti, biznes-strategiya, marketing, xo’jalik huquqi va shu kabilarni bilish ham muhim ahamiyat kasb etadi. Faqat ushbu bilimlar majmuasiga va boy mehnat tajribasiga ega bo’lgan taqdirdagina boshqaruvchilar bozor iqtisodyoti vazifalarini muvaffaqiyatli ravishda bajarishlari mumkin. Shuni ham e’tiborga olish kerakki, boshqaruv faoliyati boshqaruv apparati (organi) tushunchasiga qaraganda keng talqin qilinadi. Boshqaruv faoliyati tarkibiga jamoatchilik tashkilotlaridagi faoliyat, ish joylarida ijodiy tashabbuskorlikning yuzaga kelishi hamda ishlab chiqarishda band bo’lgan xodimlarning taklif va maslahatlarini ham kiritish mumkin. Bu esa boshqaruv faoliyatini, bevosita boshqaruv (korxona boshqaruv apparatining faoliyati) va o’zini-o’zi boshqarish (boshqaruv faoliyatining jamoatchilik shakli) turlariga ajratilgan holda tasniflash imkonini yaratadi. Faoliyatning ikkala turi ham amalda birgalikda yuritilib, ularning o’zaro aloqalari ishlab chiqarishni boshqarishning samaradoriligini oshirishda muhim ahamiyat kasb etadi. Ishlab chiqarishning, jumladan, boshqaruv foliyatining o’zining samaradorligini oshirishda, ishlab chiqarishning allohida elementlari va bo’g’inlari o’rtasida yuzaga keluvchi boshqaruv munosabatlari muhim o’rin egallaydi. Bu yerda boshqaruv organi (subyekti) yoki boshqaruvchi shaxs tomonidan boshqariluv organiga nisbatan ta’sir ko’rsatishning o’zigina kamlik qiladi.
Boshqarilayotgan obyektdan boshqaruv obyektiga javob tariqasida teskari aloqa ham bo’lishi zarur. Agar bunda teskari aloqa bo’lmasa yoki boshqaruv organi tomonidan qabul qilinmasa, boshqarilayotgan obyekt nazorat ostidan chiqishi hamda boshqarilmaydigan obyektga aylanishi mumkin. Bu vazifa amalda boshqaruvning har bir elementi yoki bo’g’ini tomonidan ma’lum bir vazifani bajarishni ko’zda tutuvchi bir-biriga bo’ysinuvchanlik tizimi yordamida bajariladi. Ya’ni gap korxona direktori, bosh muhandisi va boshqalardan, to sex boshliqlari va boshqa ishlab chiqarish bo’linmalarining boshliqlarigacha - korxonaning boshqaruvchilari yoki maxsus xizmatlariga yuklatiluvchi funksional vazifalar haqida bormoqda. Munosabatlarning bunday ko’rinishdagi bir-biriga bo’ysinuvchan-ligi boshqaruv tizimining samarali tarzda faoliyat yuritishi uchun muhim shart hisoblanadi. Shu tariqa, boshqaruv tizimi ishlab chiqarish samaradorligiga erishish va korxonaning iqtisodiy salohiyatini mustah-kamlashda muhim omillardan biri bo’lib xizmat qiladi. Shu bilan bir paytda ishlab chiqarish samaradorligining o’sish sur’ati, qabul qilingan yoki amalga oshirilayotgan boshqaruv tizimi progressivligining o’lchovi xizmatini ham o’taydi. Bundan kelib chiqqan holda, qo’yilgan maqsadga qisqa muddatda va ishlab chiqarish resurslaridan unumli foydalangan holda yaqinlashish darajasini korxonani boshqarish samaradorligining bevosita mezoni sifatida ko’rsatish mumkin. Bugungi bozor munosabatlari sharoitida boshqaruv tizimi birinchi o’rinda korxonaning barqarorligini ta’minlashi, xo’jalik tavakkalchiligini kamaytirishi, sifatli va raqobatbardosh mahsulot ishlab chiqarishga ko’maklashishi zarur. Shuningdek, u xodimlarning o’z mehnatlari natijasiga qiziqish darajasi ortishiga, ishlab chiqarish bilan bog’liq bo’lmagan xarajatlar va yo’qotishlarga yo’l qo’ymaslikka hamda mehnat va ishlab chiqarish intizomini mustahkamlashga xizmat qilishi lozim. Korxona yopiq tizim bo’lmaganligi sababli, boshqaruv tizimiga korxonada yuzaga keluvchi ichki muhitdan tashqari, tashqi muhit, avvalo, aholining turmush tarzi, jamiyat qurilmasi, davlat siyosati va hokazolar ta’sir ko’rsatishi mumkin. Biroq har qanday holda ham boshqaruv tizimi, xo’jalik hayotining zamonaviy talablari va korxonaning raqobatchi-lik muhitidagi barqarorligiga javob berishi lozim.
Ijtimoiy mehnat taqsimotiga ko’ra boshqaruv: sanoat ishlab chiqarishini, qishloq xo’jalik ishlab chiqarishini, transportni, savdoni va hakozolarni boshqarishga bo’linadi. Hududiy boshqarish darajasiga ko’ra boshqaruv: tuman viloyat , mamlakat miqyosidagi ishlab chiqarishni boshqarish turlariga bo’linadi. Boshqarishga korxona nuqtai nazaridan quyidagicha ta’rif berish mumkin.
Korxonani boshqarish – bu xo’jalik rahbar organlari, korxona ma’muriyati hamda jamoat tashkilotlarining iqtisodiy va ijtimoiy natijalarga erishishini ko’zda tutgan holda kishilar jamoasiga, ular orqali ishlab chiqarishning moddiy-buyum unsurlariga ularning o’zaro amal qilishini uyushtirish uchun maqsad yo’nalishida tartibli ta’sir ko’rsatishdir.Har qaysi ishlab chiqarish xoh u korxona darajasida , xoh u mamlkat miqyosida bo’lsin o’zining boshqariluvchisi (obyekti) va boshqaruvchisi (subyekti) ga ega bo’ladi.
Boshqariluvchi yoki boshqaruv obyekti ko’p qirrali ishlab chiqarish jarayoni bo’lib u:
- moddiy va texnikaviy tayyorgarlik (asosiy va aylanma fondlar);
- tashkiliy mehnat tayyorgarligi (kadrlarni tanlash, ishga qabul qilish , joy-joyiga qo’yish, o’qitish va hk.);
- xizmat ko’rsatishni tashkil qilish (energiya berish, ta’mirlash, tashish va hk.);
- mahsulot ishlab chiqarishning bevosita jarayoni va uni sotishni tashkil qilishni o’z ichiga oladi.
Boshqaruvning har ikkala tizimi o’zaro aloqador bir butunni tashkil qiladi va bir-biriga ta’sir ko’rsatadi. Bir tomondan, boshqaruvchi tizimga ta’sir ko’rsatgan holda uning tarkibini o’zgartiradi, uni muayyan eng qulay va eng muvofiq nisbatga keltiradi. Ikkinchi tomonda esa, boshqariluvchi tizim boshqaruvchi tizimga aks ta’sir ko’rsatadi.
Ishlab chiqarish ikki turdagi boshqarishni tashkil qiladi: buyumni, ya’ni:
- mehnat vositalarini boshqarish;
- odamlar (ishchilar) ni boshqarish.
Buyumni boshqarish uning o’zini ishlab chiqarish jarayonidan iborat. Bu jarayonda ishchilar moddiy boylik olish maqsadida mehnat buyumlariga ta’sir ko’rsatadilar va boshqarish su’bekti rolini bajaradilar. Moddiy boylik olish uchun mehnat buyumlariga bevosita ta’sir ko’rsatadigan ishchilar.
- boshqaruvchi tizimda boshqarishning obyekti (odamlarni boshqarish);
- boshqariladigan tizimda boshqarishning subyekti (buyumni boshqarish) sifatida ishtirok etadilar (3.2.1-rasm).
Ishlab chiqarishni boshqarish – ishchilarni boshqarishdan iborat bo’lib , ular o’z navbatida mehnat vositalarini boshqaradilar. Odamlarni boshqarish ishlab chiqarishda ularning munosabatlariga ham ta’sir ko’rsatishdir.Masalan: har bir korxona sexlararo asosiy va yordamchi tsexlar o’rtasida, har bir sexda esa uchastkalararo; o’z navbatida har qaysi uchastka yoki brigadalarning ishchilari o’rtasida ishlab chiqarish aloqalari va munosabatlari mavjud bo’ladi.Shuningdek, korxonalar boshqa korxonalar bilan mahsulot sotish, ishlab chiqarish vositalari bilan ta’sinlash borasida ham ishlab chiqarish aloqalarini o’rnatadi. Bu munosabatlar kooperatsiya va mehnatni , ishlab chiqarishni ixtisoslashtirish darajasiga bog’liq.
Iqtisodiy faoliyat ishlab chifarishdan boshlanadi. Har qanday ishlab chiqarishda ikki omil shaxsiy insoniy omil va moddiy ashyoviy omil ishtirok etadi. Ishlab chiqarish jarayonida mahsulot yaratiladi va u taqsimot, ayriboshlash orqali iste’mol qilish bilan tugallanadi.
Ishlab chiqarish muhitda boshqarish faoliyatining asosiy maqsadi – bu ishlab chiqarish samaradorligini oshirish va yuqori foyda olishdir. Foyda olish esa:
- ishlab chiqarish omillaridan foydalanish samaradorligiga;
- investisiya samaradorligiga;
- mahsulot sifat va uning raqobatbardoshligiga;
- tez va samarali qarorlarning qabul qilinishiga;
- yangi texnika va texnologiyaning joriy qilish darajasi kabi qator omillarga bog’liqdir.
Demak, ishlab chiqarishni boshqarish bevosita , ishlab chiqarish jarayoniga ta’sir qiluvchi tashqi va ichki omillarni boshqarish jarayonlarini o’z ichiga oladi. 
- ishchi kuchini boshqarish;
- ishlab chiqarish vositalarini boshqarish;
- texnika va texnologiyani boshqarish;
- ishlab chiqarish samaradorligini boshqarish;
- mahsulot sifatini boshqarish;
- investisiya samaradorligini boshqarish;
- innovasion jarayonni boshqarish va boshqa.
Qayd qilingan obyektlarni boshqarish dastlab rejalashtirishdan boshlanib, ishlab chiqarishni tashkil qilish, uni tartibga tushirish, muvofiqlashtirish bilan davom ettirilib, nazorat bilan tugaydi. Bu yerda rag’batlantirish ishlab chiqarishni boshqarishning barcha funksiyalari jarayonida o’z aksini topadi. 
Начало формы
Конец формы
Agar jamiyatning butun iqtisodiy tizimini oladigan bo’lsak uning tarkibiga kiruvchi ko’plab kichik tizimlarni – tarmoqlar, korxonalar, birlashmalar va hokazolarni ko’rishimiz mumkin. Bularni hammasini o’ziga yarasha boshqaruv tizimi mavjud.
Korxonada boshqaruvning ta’siri boshqaruv obyektiga yo’naltirilgan bo’lib, ishlab chiqarish va xo’jalik yuritish jarayonlari, ishlab chiqarish uskunalarini eksplutasiya qilish, turli miqyosdagi mehnat kooperasiyasi va hokazolar boshqaruv obyekti bo’lishi mumkin.
Boshqaruv subyekti esa qoidaga ko’ra, korxona rahbari yoki boshqaruv obyektlarini maqsadli ravishda boshqarishni amalga oshiruvchi xizmat rahbarlaridir. Bunga misol qilib bir korxonaning direktori, uning muovinlari, bosh muhandis, bosh texnolog, moliyaviy bo’limlar rahbarlari, sex boshliqlari va hokazolarni ko’rsatish mumkin.
Umuman olganda korxonada umumiy boshqaruv – rejalashtirish, mehnatni tashkil etish, oylik maosh, texnik nazoratni uyushtirish, sifatni oshirish ta’mirlash, moddiy texnika ta’minoti, sotish, kadrlarni tanlash va joy joyiga qo’yish, hisob-kitob va tahlil, moliya, xizmat ko’rsatish, muhofaza qilishni o’z ichiga oladi.
Korxonaning korporativ (guruhiy) manfaatini amalga oshirishning muhim omili – bu korxona ishini yaxshi boshqarish hisoblanadi. Korxona ichki va tashqi aloqalarga ega. Korxonaning ichki tuzilishi uning turli bo’linmalari o’rtasidagi aloqalardan, xodimlari bilan boshqaruvchilar (menejerlar) o’rtasidagi munosabatlardan iborat.Uning tashqi aloqalari bozor bilan yuz beradi. Bozorda korxona o’ziga resurslar yetkazib beruvchilar va o’z tovarining xaridorlari bilan aloqa bog’laydi.
Korxonaning pul bilan bo’ladigan aloqalari banklar, moliyaviy kompaniyalar, sug’urta firmalari orqali yuz beradi. Korxonaning bozor iqtisodiyoti sharoitida ish faoliyatini samarali bo’lishi uchun menejment ishi (boshqaruv ishi) yaxshi yo’lga qo’yilishi kerak.
Bozor munosabatidagi korxona boshqaruvining bunday ko’rinishidagi bir-biriga bog’liqligi, bo’ysunuvchanligi boshqaruv tizimining samarali faoliyat yuritishi uchun muhit shart hisoblanadi. Har qanday holatda boshqaruv tizimi xo’jalik hayotining zamonaviy talablari va korxonalarning raqobatchilik muhitidagi barqarorligiga javob berishi lozim. Shunday qilib, boshqaruv tizimi ishlab chiqarish samaradorligiga va korxonaning iqtisodiy salohiyatini mustahkamlashda muhim omillardan biri bo’lib xizmat qiladi. Har bir korxonaning ishlab chiqarish tuzilmasi mavjud. Korxona qanchalik yirik bo’lsa, uning ishlab chiqarish tuzilmasi ham shunchalik murakkab bo’ladi.
Ishlab chiqarish tuzilmasiga asosiy, yordamchi, xizmat ko’rsatish jarayonlari amalga oshiriluvchi sex va uchastkalar kiritiladi.Ishlab chiqarish bo’g’inlari, korxona boshqaruvi hamda xodimlarga xizmat ko’rsatuvchi tashkilotlar, ularning miqdori, kattaligi va egallab turgan maydoni, xodimlarning soni va ishlab chiqarish imkoniyatlari korxonaning umumiy tuzilmasini ifodalaydi.
Sanoat korxonalari ishlab chiqarish tuzilmasining uch xil turi mavjud: texnologik, predmetli va aralash. Texnologik tuzilmali korxonalarda sexlar va ishlab chiqarish uchastka-lari texnologik jihatdan bir xillik tamoyili asosida tashkil qilinadi (masalan, to’qimachilik kombinatlarida yigiruv va to’quv sexlari).
Predmetli tuzilmaga asoslangan korxonalarda har bir sex ma’lum bir mahsulot yoki uning bir qismini ishlab chiqaradi (masalan, avtomobil zavodida motor sexi, shasse sexi va hokazo).
Aralash (predmetli texnologik) tuzilma tayyorlov sexlarini texnolo-gik tamoyilda (temirchilik, cho’yan quyish, po’lat quyish va hokazo), ishlov berish va mahsulot chiqarish sexlarini esa predmetli tamoyil asosida tashkil etishni nazarda tutadi. Sanoat korxonalarining ishlab chiqarish tuzilmasi doimo vaziyatdan kelib chiqib takomillashib boradi. Yuqoridagi boshqaruv tizimidagi barcha ishlarni samarali olib borilishi milliy iqtisodiyotda umumiqtisodiy ahamiyatga ega, chunki u qanchalik rivoj topsa, yaxshi yo’lga qo’yilsa, shunchalik ishlab chiqarish jamiyatdagi talab-ehtiyojni to’laroq hisobga oladi, barqaror iqtisodiy rivojlanish tez boradi
Korxonani boshqarishda samaradorlikka erishish uchun, avvalo, boshqaruvning maqsadlari, shuningdek, vositalari va unga erishish usullarini aniq belgilab olish zarur. Shu bilan bir paytda boshqaruv maqsadlari tushunarli bo’lishdan tashqari, ular barcha bajaruvchilar tomonidan amalga oshirilishiga ham e’tibor berish lozim. To’g’ri qo’yilgan maqsad korxona rahbarining, shuningdek, butun jamoa va har bir xodimning manfaatlarini ifodalaydi. Bunday natijaga maqsad korxonaning joriy va istiqboldagi rivojlanishi bo’yicha vazifalar majmuasining bir bo’lagiga aylangan holda erishish mumkin. Bunday yondashuv, ishlab chiqarish maqsadining ishlab chiqarishni boshqarish bilan moslashuvini ta’minlovchi eng qisqa yo’lga olib keladi. Bunday moslashuv esa, boshqaruvning ham tizim sifatida, ham alohida faoliyat turi sifatida maqsadga muvofiqligidan darak beradi. Deyarli har bir korxonaning maqsad va vazifalari bugungi kunda “Korxonalar to’g’risida”gi qonunda belgilab berilgan va shu qonun asosida tartibga solib turiladi. Yuqori sifatli va raqbotbardosh mahsulotlarni eng kam xarajatlar asosida ishlab chiqarish eng ko’p daromad olishni ta’minlab, inqirozga uchrashdan saqlaydi hamda har bir korxonaning asosiy vazifasi hisoblanadi. Boshqaruvning barcha vazifalari ushbu maqsad amalga oshishiga xizmat qilishi lozim. Boshqaruvning samaradorligiga ko’p jihatdan korxona oldiga qo’yilgan maqsadlar va bajariluvchi vazifalarning o’zaro munosabatlari yordamida erishiladi.
Korxonani boshqarishning maqsadlarini quyidagi turlarga bo’lib tasniflashimiz mumkin:
- amalga oshirish muddatiga ko’ra - joriy va istiqbolli;
- ahamiyat darajasiga ko’ra - asosiy (strategik) va ikkinchi darajali (taktik);
- boshqaruv obyektiga munosabatiga ko’ra - xususiy va umumiy;
- natijaga erishish darajasiga ko’ra - yakuniy va oraliq yoki bosqichli.
Boshqaruv jarayonida joriy maqsadlarni istiqboldagi maqsadlarga, xususiy maqsadlarni umumiy maqsadlarga, oraliq maqsadlarni yakuniy maqsadlarga mos kelishi va bo’ysinishini ta’minlash zarur. Asosiy maqsadlarni amalga oshirishga ko’proq e’tibor qaratish kerak. Korxona yoki unga tenglashtirilgan xo’jalik subyektlarini boshqarish faoliyati to’laligicha shu vazifalarni bajarishga qaratilishi lozim. Asosiy maqsadni ikkinchi darajali vazifalardan ajrata olish qobiliyati, zamonaviy menedjerlarning eng muhim professional ko’rsatkichlaridan biridir. Boshqaruv jarayoni asosan davriy (siklik) xarakterga ega bo’ladi. U maqsad va vazifalarni belgilash bilan boshlanib, ularni bajarish, ya’ni muayyan bir natijalarga erishish bilan tugallanadi. Natijalar to’g’risida (maqsadga erishish darajasi) olingan axborotlar asosida yangi vazifalar belgilanadi va boshqaruv sikli qaytadan boshlanadi. Bunday sikllarning soni bir nechta bo’lib, ular birinchi o’rinda boshqaruv obyektining o’ziga xos xususiyatlari va boshqa ko’rsatkichlar bilan ifodalanadi. Amaliyotda turli xil sabablarga ko’ra, ishlab chiqarish belgilangan parametrlardan chetga og’ishi, boshqaruv esa qo’yilgan maqsadga erishmasligi mumkin. Bunday hollarda operativ tartibga solish yo’li bilan chetga og’ishlar olib tashlanadi va ishlab chiqarish jarayonining me’yoriy tarzda faoliyat yuritishi ta’minlanadi. Umuman olganda, boshqaruv siklini - maqsad va vazifalarni belgilashdan natijalarga erishishgacha quyidagi chizma shaklida ko’rsatish mumkin (3.4.1-rasm).
Korxonani boshqarishning samaradorligi, maqsadlarni shakllantirish va amalga oshirishga qanchalik kam vaqt sarflansa, shunchalik yuqori bo’ladi. Bunga korxona rahbari (menedjeri) va boshqaruv funksiyalarini bajarishga mas’ul bo’lgan boshqa shaxslarning tajribasi va malakasidan tashqari, boshqaruv amaliyoti va ish tartibiga sarflanuvchi vaqtning qisqartirilishi, boshqaruv jarayonlarini mexanizasiyalashtirish va avtomatlashtirish, boshqaruv qarorlarini qabul qilish va amalga oshirishni oqilona tashkil qilish bo’yicha tashkiliy-texnikaviy chora-tadbirlar majmuasini qo’llash hisobiga erishiladi.
Ijobiy natijaga erishishga qaratilgan qarorni to’g’ri qabul qilish uchun bu qarorni qabul qilish oqibatida yuzaga kelishi mumkin bo’lgan natijalarni oldindan ko’ra bilish, rivojlanish istiqbollarining turli variantlariga to’g’ri baho berish zarur. Bu esa korxonani boshqarishning asosiy strategik vazifalarini belgilab beradi. Ular qatoriga nafaqat maksimal daromad olishni, balki ishlab chiqarishni qayta ta’mirlash va modernizasiyalashtirish, iste’molchilar talabiga javob beruvchi zamonaviy mahsulotlarni ishlab chiqarish, faoliyat yo’nalishlarini bugungi kun va kelajakdagi istiqbolarini e’tiborga olib belgilash ham kiritiladi. Sanab o’tilganlarning oxirgisi o’z navbatida ijodiy yondashuvni va boshqaruv qarorlarining yangi yo’nalishlarini izlashni talab qiladi.
Boshqaruv qarori - boshqaruv faoliyati texnologiyasidagi muhim bo’g’indir.
Boshqaruvning maqsad va vazifalarini amalga oshirish ko’p jihatdan qarorlarning to’g’ri qabul qilinishiga bog’liq bo’ladi. Boshqaruv qarori bir tomondan asosan korxonaning rahbarlari tomonidan amalga oshiriluvchi mantiqiy-fikriy faoliyat bo’lsa, ikkinchi tomondan, emosionalpsixologik xatti-harakatdir.U insonning boshqaruv qarorlarini qabul qilish jarayonlarida to’plagan tajribasi, bilimi va fikrlash doirasining chuqurligiga bog’liq bo’ladi. Boshqaruv qarorlari quyidagi belgilar bo’yicha tasniflanadi:
- kompetentlik va mas’uliyat bo’yicha - yakka tarzda yoki kollegial (jamoa) boshqaruv qarorlari;
- mazmuni bo’yicha - ilmiy-texnik, iqtisodiy, tashkiliy, ijtimoiy boshqaruv qarorlari;
- xarakteri bo’yicha - operativ-taqsimlovchi, xo’jalik-raxbarlik va me’yoriy boshqaruv qarorlari;
- ta’sir ko’rsatish darajasi bo’yicha - bir va ko’p darajali boshqaruv qarorlari;
- ta’sir ko’rsatish yo’nalishi bo’yicha - ichki va tashqi;
- ta’sir ko’rsatish miqyosi bo’yicha - xususiy va umumiy (majmuaviy);
- ta’sir ko’rsatish davri bo’yicha - bir martalik va ko’p martalik.
Boshqaruv qarorlari amalga oshirish imkoniyatlari, o’z vaqtida amalga oshirish, aniqlik, qonuniylik va shu kabi talablarga javob berishi lozim. Bajarish jarayonida eng kam o’zgartirish va tuzatishlarga uchraydigan qaror eng yaxshi qaror hisoblanadi. Amaliyot shuni ko’rsatadiki, hozirgi paytda ko’plab korxonalarning rahbarlari boshqaruv faoliyati jarayonida to’g’ri qaror qabul qilish uchun yetarli bilim va tajribalarga ega. Ma’lumki, boshqaruv qarorlari ishlab chiqarish vositalariga qaraganda, ko’proq muayyan shaxslarga yo’naltirilgan bo’ladi. Shu sababli boshqaruv va boshqaruv qarorlari - birinchi o’rinda ishlab chiqarish jarayonida odamlar o’rtasida yuzaga keluvchi munosabatlardir. Bu yerda o’z vakolatlari doirasida boshqaruv qarorini qabul qiluvchi shaxs yoki boshqaruv idorasining qanday tamoyillarga tayanib ish ko’rishi muhim ahamiyatga ega. Tamoyil - maxsus kategoriya bo’lib, alohida shaxs yoki jamoa qaror qabul qilishda unga tayanadi. Tamoyil faqat insongagina xosdir.
Mashinalar va jonivorlar biron-bir tamoyilga ega bo’lmaydi. Ma’lum bir tamoyillardan kelib chiqqan holda aynan inson o’zini o’rab turgan dunyo bilan munosabatlarini yaratadi (uy, ko’prik quradi, kemasozlik va hokazolarni amalga oshiradi).
Korxonadagi boshqaruv faoliyati shuningdek, ma’lum bir tamoyillar asosida amalga oshiriladi. Bu tamoyillar birinchidan, ishlab chiqarish qatnashchilari orasidagi kelishuvlarni o’rnatsa, ikkinchidan, yuzaga kelishi mumkin bo’lgan xatolarning oldini oladi hamda boshqaruv mehnatining samaradorligini oshiradi. Zamonaviy fan va menedjment amaliyoti korxonalarni boshqarishning quyidagi tamoyillarini eng asosiylari sifatida qabul qiladi:
1) ilmiylik;
2) tizimlilik va komplekslik;
3) yakka boshqaruv va kollegiallik;
4) tartib va adolat;
5) xodimlarni moddiy va ma’naviy rag’batlantirish;
6) tejamkorlik va samaradorlik;
7) tashabbuskorlik va korporativ ruhiyat;
8) vakolat va majburiyat.
Boshqaruvning ilmiylik tamoyili o’zaklarning o’zagidir. Amalda bu tamoyil, avvalo jamiyat rivojlanishining obyektiv qonunlari va fan-texnika yutuqlaridan xabardor bo’lishni talab qiladi. Uning yordami bilan ishlab chiqarish va boshqaruvning zaruriy mutanosibligi ta’minlanadi, boshqaruv qarorlaridagi xatolar kamaytiriladi, og’irlik markazi eng katta sifat va miqdor yutuqlariga erishishga o’tkaziladi.
Ilmiylik tamoyili ishlab chiqarish masalalarini hal qilishda iqtisodiy-matematik usullardan keng foydalanish, boshqaruvning maqsadlidasturiy usullarini amalga kiritish, zamonaviy elektron-hisoblash texnikasi va boshqaruvning avtomatlashtirilgan tizimlaridan foydalanishni ko’zda tutadi. Tizimlilik va komplekslilik tamoyili ilmiylik tamoyilining davomi bo’lish bilan birga, o’zining mustaqil ahamiyatiga ham ega. U boshqarilayotgan tizimning vertikal va gorizontal yo’nalishlari bo’yicha barcha xususiyatlarini qamrab olishni ko’zda tutadi. Tizimlilik va komplekslilik tamoyili boshqaruv usullarining tarqoqlikdagi tamoyillariga hamda bir daqiqalik foyda va ehtiros tufayli yuzaga keluvchi qarorlarga qarshi qo’yiladi. U ishlab chiqarishning bir maromda amalga oshirilishini ta’minlashga xizmat qiladi, ishlab chiqarish uchun qulay sharoit yaratadi.
Yakka boshqaruv va kollegiallik korxonani boshqarishning muhim tamoyillaridan biridir. Bu tamoyil, ayniqsa, aksionerlik sharoitlarida faoliyat yurituvchi korxonalarda aniq ko’zga ko’rinadi. Yakka boshqaruv har bir xo’jalik rahbari o’z vakolati doirasidagi masalalarni hal qilishda qonun tomonidan berilgan huquqlarga asosan bir o’zi (yakka tarzda) qaror qabul qilishini hamda korxona faoliyati uchun shaxsan javobgarligini anglatadi. Bundan tashqari, yakka boshqaruv xodim buyruqlarni faqat bitta bevosita (to’g’ridan-to’g’ri) boshliqdan olishi mumkin yoki shart bo’lgan hollarni ham anglatadi. Kollegiallik korxona jamoasining ishlab chiqarish bilan bog’liq bo’lgan qarorlarni qabul qilishdagi faol ishtirokida ifodalanadi. Ma’lum bir ma’noda, ayniqsa, boshqaruvning iroda bilan bog’liq bo’lgan usullarida kollegiallik yakka boshqaruv qarama-qarshilikni anglatadi. Bozor iqtisodiyoti sharoitlarida ushbu tamoyilning imkoniyatlari sezilarli ravishda kengaytirilgan. Tartib va adolat – bu, boshqaruvning har bir qadamda o’zini eslatib turuvchi tamoyilidir. Ko’p hollarda aynan shu tamoyilga ko’ra korxona va uning rahbariga tavsifnoma beriladi.
Korxona rahbari qanchalik bilimli va tajribali, uning kasb mahorati va madaniyati qanchalik yuqori bo’lsa hamda u jamoa to’g’risida qanchalik ko’p qayg’ursa, tartib va adolat ko’rsatkichlari shunchalik yuqori bo’ladi. Qisqaroq qilib aytganda, tartib – bu, har bir kishi va hamma narsa o’z joyida bo’lishini, adolat esa rahmdillik va odillikning uyg’unligini anglatadi. Boshqaruvning tartib va adolat tamoyili kadrlar teztez almashishini oldining olib, korxona obro’sining o’sishiga hamda bunga korxona jamosini qiziqtirishga xizmat qiladi.
Xodimlarni moddiy va ma’naviy rag’batlantirish tamoyili mehnat unumdorligini oshirishda muhim turtki hisoblanadi va boshqaruv tizimining samaradorligini aks ettiradi. Xodimlarning sadoqati va qo’llabquvvatlashiga erishish maqsadida ular o’z xizmatlari uchun, ishchilar esa bajarilgan ishning sifati va miqdori uchun adolatli tarzda haq olishlari zarur. Bundan tashqari, ma’naviy rag’batlantirish moddiy rag’batlantirishdan kam ahamiyatga ega emas. Rahbarning iqtidori, xodim (xodimlar, ishchilar) ning tashabbus va yutuqlarini o’z vaqtida ilg’ab olib, munosib baholash hamda ularni ham moddiy ham ma’naviy rag’batlantirish tizimini mohirona qo’llashida ko’zga tashlanadi. Tejamkorlik va samaradorlik tamoyili – bu, korxona boshqaruvining barcha bo’g’inlarida amalga oshirilishi lozim bo’lgan tamoyildir. Bu tamoyilning mohiyati moddiy va mehnat resurslaridan tejamkorlik bilan foydalanish, eng kam xarajatlar bilan eng ko’p natijalarga erishish, ishlab chiqarish zahira-laridan to’liq foydalanishda ifodalanadi. Biroq bu tamoyil istisno tariqasida qo’llanmay, faqat korxona rahbarining emas, balki butun jamoa va birinchi o’rinda xom ashyo va materiallardan tayyor masulot yaratuvchi ishchilarning mehnat qoidasiga aylangan taqdirdagina haqiqiy tasdig’ini topadi.
Tashabbuskorlik va korporativ ruhiyat boshqaruvning muhim tamoyili bo’lish bilan birga, korxonaning bozor tizimida muvaffaqiyatli faoliyat yuritishiga turtki hamdir. Umuman olganda, boshqaruv tashabbuskorliksiz, istiqbolni ko’rmasdan, ijodiy yondashuvsiz muvaffaqiyatlarga erishishi amrimaholdir. Boshqaruv ijodiy negizni, tashabbuskorlikni korporativlik bilan bog’lagan holda boyitadi. Agar korporativ ruhiyat ishlab chiqarish bilan shug’ullanuvchi jamoa uyg’unligining natijasi, ittifoqi bo’lsa, tashabbuskorlik faol harakatlarni anglatib, korxona jamoasiga va har bir xodimga ishlab chiqarishni rivojlantirishning turli xil dasturlarini ishlab chiqish va amalga oshirishda qo’shimcha kuch-quvvat baxsh etadi. Vakolat va majburiyat tamoyili boshqaruvning rasional, aniq va yo’lga qo’yilgan tashkiliy tizimini yaratish, lavozimlarga oid yo’riqnoma hamda rahbar va mutaxassislarning huquq va burchlari to’g’risidagi hujjatlarni ishlab chiqish, bajarilgan ish uchun moddiy javobgarlikni belgilash, buyruq va ko’rsatmalarni o’z vaqtida tayyorlashni anglatadi. Har bir lavozim egasi - bo’lim yoki xizmat boshlig’idan, to korxona rahbarigacha - boshqaruv faoliyatidagi o’z vakolatlarini yashirmasligi va majburiyatlarini kamay-tirmasligi - boshqalarning, ya’ni unga bo’ysinuvchi shaxslarning zimmasiga yuklamasligi lozim. Yuqorida ko’rsatilgan tamoyillar ham alohida, ham birgalikda boshqaruv tizimining ishonchliligiga va korxona rahbari hamda har bir boshqaruv tuzilmasining obro’sini o’stirishga xizmat qilishi lozim. Bundan tashqari, ular doimiy ravishda mukammallashtirib borilishi hamda zamon ruhi va xo’jalik yuritish mexanizmi talablariga javob beruvchi yangi tamoyillar bilan to’ldirilishi zarur. Bu esa boshqaruv tizimi va jarayonlarining yangi shakl va usullarini rivojlantirishga imkon yaratadi.
Ishlab chiqarishni boshqarish tizimini takomillashtirib borish mulkchilik shakli, faoliyat natijasi va yuzaga kelgan tashkiliy tuzilmaning qandayligidan qat’i nazar, har bir korxona uchun muhim vazifa hisoblanadi. Ushbu vazifani muvaffaqiyatli hal qilish korxonalarga, birinchi o’rinda, boshqaruv tizimining samaradorligini oshirishga, ikkinchidan, xarajatlarni kamaytirish va ishlab chiqarish faoliyatining iqtisodiy ko’rsatkichlarini yaxshilashga imkon yaratadi.
Bugungi kunda boshqaruv tizimini mukammallashtirish sohasida quyidagi tendensiyalar yuzaga kelmoqda: boshqaruv faoliyatining maqsadli tavsifini kuchaytirish; boshqaruvning moslashuvchan tuzilmalarini yaratish va boshqaruv apparatining faoliyatini yaxshilash, jumladan, ortiqcha boshqaruv bo’g’inlarini qisqartirish hisobiga; ishlab chiqarishni boshqarishda jamoalar rolining o’sishi va ularning yuqori natijalarga erishishga yo’naltiriliganligi; mehnat faoliyati ijtimoiy sharoitlari-ning yaxshilanishi. Bu tendensiyalarga asosan korxonalarning boshqaruv organlari tuzilmalarini takomillashtirish yo’nalishlari ham aniqlanib, ularga avvalo sifat ko’rsatkichlari asos qilib olingan. Bu ko’rsatkichlar qatoriga quyidagilarni kiritish mumkin: