Божхона ишининг илк элементлари тарихда қачон пайдо бўлган?

1.Қисман чеклашлар сиёсати. Ушбу сиёсат ички бозорга товарларнинг муайян турлари, масалан, мамлакат мафкураси ва аҳолининг турмуш тарзига зид бўлган кино-видео маҳсулотлари, босма нашрлар, шунингдек аҳоли соғлиғига зарар етказувчи айрим турдаги товарларнинг кириб келишига йўл қўймаслик мақсадида юритилади.
Мисол учун, Ўзбекистон Республикасининг 1998 йил 29 августдаги 678-I-сонли “Маданий бойликларни олиб чиқилиши ва олиб кирилиши тўғрисида”ги қонунига асосан, конституциявий тузум ва давлат мустақиллигига путур етказишга, ҳудудий яхлитликни бузишга қаратилган, урушни, террорчиликни, зўравонликни, диний экстремизмни, ирқчиликни тарғиб қилувчи ашёларнинг, шунингдек порнографик мазмундаги материалларнинг маданий бойликлар ниқоби остида олиб кирилиши тақиқланади.
2. Протекционизм сиёсати. Протекционизм термини лотинча “protectio” – ҳимоя остига олиш, раҳнамолик қилиш маъносини англатиб, ички бозорни хорижий рақобатидан ҳимоя қилиш тушунилади. Одатда, ушбу сиёсат экспортбоп товарлар ишлаб чиқаришни ва маҳаллий товарлар импортнинг ўрнини босишини рағбатлантириш билан бирга қўшиб олиб борилади. Протекционизм – миллий тадбиркорларга алоҳида имтиёзли шароитлар яратиб беришдир.
Булар тариф (импорт товарларига нисбатан юқори божхона божи ставкалари белгиланиши) ёки нотариф усулларнинг қўлланиши орқали миллий ишлаб чиқарувчиларга ички бозорда вужудга келтириладиган қулай шароитлардир.
Мисол учун, Япония автомобилсозлигининг дунёни ҳайратга солган шиддатли муваффақияти кўп жиҳатдан Япония ҳукуматининг ҳозирда дунёга машхур бўлган «Мазда», «Ниссан», «Тойота» фирмалари қарор топиши шароитида ўтказган протекционизм сиёсати билан изоҳланади. 1932 йилда ҳукумат хали унча ўзини тутиб олмаган ушбу автокомпанияларни автомобиль индустриясининг АҚШ автогигантларидан ҳимоя қилиш учун хорижий машиналар ва эҳтиёт қисмлар импортига доир божларни кескин оширди.
Ўзбекистон Республикаси томонидан ҳам маҳаллий автомобилсозлик саноатини қўллаб-қувватлашда шу каби сиёсат юритилган.
Протекционизм сиёсати ривожланаётган мамлакатларда айниқса кенг қўлланилади. Ундан таркибий ўзгартиришни амалга оширишда, импортнинг ўрнини босиш мақсадида миллий саноатни қўллаб-қувватлашда фойдаланилади.