Bitiruv malakaviy ishi Mavzu: Islom dinida oila ma’naviyatining ifodasi

Bitiruv malakaviy ishining tuzilishi. Bitiruv malakaviy ishi kirish, ikki bob, to’rt paragraf, xulosa hamda foydalanilgan adabiyotlar ro’yxatidan iborat.
1.Bob. OILA MUNOSABATLARINING TARIXIY KELIB CHIQISHI VA RIVOJLANISHI BOSQICHLARI
1.1.Islomda oila tushunchasi, mohiyati va vazifalari
Mustaqil O’zbekistonda oila ma’naviyati insonparvarlik bilan sug’orilgan islomiy va milliy qadriyatlarning chuqur tarixiy ildizlariga borib taqaladi. Qur’on Karim va hadislarda ta’lim-tarbiya, oila qurish haqida ko’plab fikrlar ilgari surilgan. Shu bilan birga islomda oila munosabatlarida ruxsat etilgan va ta’qiqlangan xatti-harakatlar, ya’ni faqat halol ishlar bilan shug’ullanishga, harom ishlardan qochishga da’vat etiladi.
Oila va jamiyat tinch-totuv va farovon bo’lishi uchun muqarrar zaruriy shart-sharoitlar lozim bo’ladi. Bunday sharoit birinchi navbatda oilaning salohiyati va barqarorligini ta’minlashdan boshlanadi. Shu sababdan dinimiz oilaga, uni barpo etish jihatlariga katta e’tibor qaratadi. Oila binosini mehr-muhabbat asosida haqiqat va adolat zaminiga qurib, mustah kamlab, baxt-saodatga erishishga chorlaydi.
Dunyodagi barcha jonzotlar juft-juft yaratilgan. Aql-zakovatli inson o’z juftini qadrlab, oilasining barqaror bo’lishini ta’minlaydi.
Alloh taolo erkak va ayolni oila qurib yashashda bir-biriga suyanch, tayanch qilib yaratganligini marhamat qilib: “Uning alomatlaridan (yana biri) – sizlar (nafsni qondirish jihatidan) taskin topishingiz uchun o’zlaringizdan juftlar yaratgani va o’rtangizda inoqlik va mehribonlik paydo qilganidir. Albatta, bunda tafakkur qiladigan kishilar uchun alomatlar bordir” (Rum surasi 21-oyati) deydi.
Oilaviy munosabatlarning asosiy talablaridan biri oila qurgan har bir insonning jufti bilan inoqlik va mehribonlikda umr kechirishidir.
Oila ijtimoiy-tarixiy jarayonlar ta’sirida shakllangan va rivojlangan ijtimoiy institut bo’lib, uning miqdor va sifat o’zgarishlariga sabab bo’lgan tabiiy, ijtimoiy, iqtisodiy, ma’naviy omillar quyidagilardan iborat:
a) oila kishilarning tabiiy-biologik (jinsiy munosabatlar, nasl qoldirishga intilish), ijtimoiy-huquqiy (nikoh), ma’naviy-axloqiy (er-xotin, ota-ona va bolalar o’rtasidagi sevgi, mehr-muhabbat tuyg’usi) omillar asosiga qurilgan birlik¹;