Bitiruv malaka ishi

Didaktik tamoyillar va uni Iqtisodiy bilim asoslari fanining Bozor bobini o‘qitishda qo‘llanilishi.

Bugungi kunning Iqtisodiy bilim asoslari o‘qituvchisi Iqtisod fanidan mukammal bilimga ega bo‘lishi bilan birgalikda u zamonaviy o‘qitish qonuniyatlaridan ham chuqur bilimga ega bo‘lish zarur. Iqtisodiy bilim asoslari Bozor bobining mavzularida o‘quv jarayonini tashkil etishda didaktik qoyidalarga amal qilingandagina o‘qitish samarali bo‘lishi mumkin. Ta’lim nazariyasi bilan didaktika fani shug’illanadi. Didaktika faniga birinchi bo‘lib chex mutafakkiri YA.A. Komenskiy asos soldi va o‘zining “Buyuk didaktika” (1630-yil) asarini yaratdi. Keyinchalik Didaktika asoslari J.J. Russo, I.G. Pistolosum, V.Disterverg, K.D. Ushinskiylar tomonidan rivojlantirildi. Didaktika tamoyillari quyidagilar hisoblanadi:

1. 
   Ta’limning ilmiyligi va elementarligi.
   
2. 
   Ta’limning sistematikligi.
   
3. 
   Nazariya bilan amaliyotning birligi.
   
4. 
   Ta’limning onglilik va ijodkorligi.
   
5. 
   Ko‘rgazmalilik.
   
6. 
   Ta’limning mustahkamlik tamoyili.
   

Umumiy o‘rta ta’lim maktablarida iqtisodiy ta’limining ilmiyligi zamona talabidan kelib chiqib, u o‘quv dasturlarida va darsliklarda o‘z aksini topadi. Jamiyatning rivojlanishi, iqtisodiy bilim asoslari faninnig kengayib borishi bilan umumta’lim maktablarida o‘qitilayotgan iqtisodiy bilim asoslari fani mazmuni ham yangilanib boradi. Iqtisodiy bilim asoslari fani sohasida yangi-yangi kashfiyotlar qilinmoqda, ammo ularning barchasini maktab dasturiga kiritishning imkoni yo‘q. Shuning uchun Iqtisodiy bilim asoslari fani sohasida qilinayotgan yangiliklarning eng muhimlari tanlab olinib o‘quvchilarning yoshini e’tiborga olgan holda bayon etilishi lozim. Elementarlik deganda, o‘quv mavzusini siyqalashtirish, yuzakilashtirish deb tushinmaslik kerak, o‘quv mavzusining ilmiyligini saqlab qolish bilan birgalikda, uni zamonaviy o‘quv vositalari va usullar yordamida o‘quvchi tushunadigan tarzda bayon etish lozim. Tushinarlik yoki elementarlik tamoyilini amalga oshirish uchun o‘qituvchidan oddiydan murakkabga, konkret narsadan abstrakt narsaga o‘tish, o‘quvchilarning individual xususiyatlarini, ularning tayyorgalik darajasini hisobga olishni taqoza etadi.