Bank ishi va audit

58-modda. Jiddiy qoidabuzarliklar uchun choralar va sanksiyalar.
Jiddiy qoidabuzarliklarni sodir etganlik uchun Markaziy bank:
banklar va bank faoliyati to‘g‘risidagi qonunchilikni buzgan holda amalga oshirilgan moliyaviy operatsiyalardan olingan daromadlarning miqdorini aniqlash imkoni bo‘lsa, bankdan ushbu daromadlarning bir yarim baravari miqdoridan yoki bank tomonidan o‘tgan moliya yili davomida olingan sof foydaning ikki foizi yoki bank jami kapitalining 0,5 foizi miqdoridan ortiq bo‘lmagan miqdorda jarima undirishga;
ushbu Qonun 51-moddasining ikkinchi qismida ko‘rsatilgan choralarni bankka nisbatan alohida holda yoki jamlangan tarzda qo‘llashga;
bank kuzatuv kengashining, boshqaruvining a’zosidan yoki muhim ahamiyatga ega xodimidan jarima qo‘llanilayotgan oydan avvalgi bir yil ichida olingan mukofotning yetmish besh foizidan ortiq bo‘lmagan miqdorda jarima undirishga;
qoidabuzarliklar, qoidabuzarlarga nisbatan qo‘llanilgan choralar va sanksiyalar to‘g‘risidagi xabarni ommaviy axborot vositalarida e’lon qilishga haqli.
Banklar tomonidan to‘lovlar o‘z vaqtida amalga oshirilmagan hollarda Markaziy bank bankning aybi bilan amalga oshirilmay qolgan summaga teng miqdorda jarima solishga haqli.
59-modda. Juz’iy qoidabuzarliklar uchun choralar va sanksiyalar.
Juz’iy qoidabuzarliklarni sodir etganlik uchun Markaziy bank:
banklar va bank faoliyati to‘g‘risidagi qonunchilikni buzgan holda amalga oshirilgan moliyaviy operatsiyalardan olingan daromadlarning miqdorini aniqlash imkoni bo‘lsa, bankdan ushbu daromadlardan yoki bank tomonidan o‘tgan moliya yili davomida olingan sof foydaning bir foizi yoki bank jami kapitalining 0,1 foizi miqdoridan ortiq bo‘lmagan miqdorda jarima undirishga;
ushbu Qonun 51-moddasining ikkinchi qismida ko‘rsatilgan choralarni bankka nisbatan alohida holda yoki jamlangan tarzda qo‘llashga;
bank kuzatuv kengashining, boshqaruvining a’zosidan yoki muhim ahamiyatga ega xodimidan jarima qo‘llanilayotgan oydan avvalgi bir yil ichida olingan mukofotning ellik foizidan ortiq bo‘lmagan miqdorda jarima undirishga;
qoidabuzarga nisbatan choralar va sanksiyalar qo‘llanilishi to‘g‘risida yozma ogohlantirish yuborishga haqli.
Bankka oid qoidabuzarliklar kuzatilgan taqdirda yuqorida qonun qoidalar asosida Markaziy bank tomonidan choralar ko’riladi hamda sanksiyalar qo’llaniladi.