Avtotransport vositalarida

Takrorlash uchun savollar:
1. Yengil avtomobillarda yo‘lovchilarni tashish, asosan, qaysi
subyektlar tomonidan amalga oshiriladi?
2. Taksomotor transporti qanday ustuvorliklarga ega?
3. Yengil avtomobil-taksilar korxonalarga va aholiga qanday transport
xizmati turlarini ko‘rsatmoqda?
4. Yengil avtomobil-taksilarga bo‘lgan ehtiyojni qanday aniqlash
mumkin?
5. Transport xizmati bozorini segmentlash qanday amalga oshiriladi?

---

105
2.2. Taksilarning to‘xtash joylari
Yengil avtomobil-taksilarning ish unumdorligi va ayniqsa,
yo‘lovchilarga transport xizmatini ko‘rsatish sifati ularning
to‘xtab turish joylarining qanday joylashtirilganiga bog‘liq bo‘ladi.
To‘xtab turish joylarini shunday joylashtirish kerakki, unga
buyurtma berilganida mijozni olish uchun yuriladigan masofa
2 km dan ko‘p bo‘lmasin.
Taksi to‘xtash joylari yo‘lovchilarning ko‘p to‘planadigan
joylarida, temiryo‘l shoxbekati, aeroport, teatr, savdo markazi,
metro bekatlari va ayniqsa, bozorlar yaqinida tashkil etiladi.
Taksi to‘xtash joyi sonining ko‘payishi yengil avtomobil-
taksining yo‘lovchisiz yurish masofasini va buyurtmaga yetkazib
berish vaqtini kamaytiradi.
Yengil avtomobil-taksi to‘xtash joyi quyidagi belgilariga qarab
ajratiladi:
— joylashuv joyiga qarab — shahar, shahar atrofi, bozor
yonidagi va hokazo;
— doimiy yoki vaqtinchalik (faqat ma’lum soatlarda)
to‘xtash joylari;
— yo‘l yoqasidagi, yarim cho‘ntak yoki to‘liq cho‘ntak
to‘xtash joylari;
— yer ostida, yer bilan bir sathda, yer ustida;
— bir qavatli yoki ko‘p qavatli;
— parallel, burchaksimon, perpendikular va hokazo.
Bir paytda to‘xtab turishi zarur bo‘lgan taksilarning soni
ularga bo‘lgan talabni o‘rganish orqali aniqlanadi.
Taksilarning to‘xtash joyini joylashtirishda va ularda harakatni
tashkil etishda birinchi galda O‘zbekiston Respublikasi «Yo‘l
harakati xavfsizligi to‘g‘risida»gi Qonunda belgilab qo‘yilgan
talablar bajarilishiga alohida e’tibor berilishi kerak. Buning uchun
taksilarning to‘xtash joylari yo‘l harakati xavfsizligi xizmati
organlari bilan kelishilgan holda yo‘l chiziqlari va belgilari bilan
ta’minlangan bo‘lishi zarur.