Автомототранспорт воситаларини давлат рўйхатидан ўтказиш ва уларга рўйхатдан ўтказиш давлат рақами белгиларини бериш тартибини такомиллаштириш тўғрисида

5-боб. Бошқа шахсларга ўтказиш билан боғлиқ бўлмаган автомототранспорт воситалари билан келишувларни ҳисобга қўйиш
45. Нотариус, шунингдек қонун ҳужжатларида назарда тутилган ҳолатларда эса консул томонидан ҳам тасдиқланган автомототранспорт воситаларидан фойдаланиш ва (ёки) тасарруф этиш ишончномалари (юридик шахслар томонидан ўз ходимларига берилган автомототранспорт воситаларидан фойдаланиш ва (ёки) тасарруф этиш ишончномалари бундан мустасно), ижара, текинга фойдаланиш ва автомототранспорт воситаларини гаровга қўйиш шартномалари, автомототранспорт воситасининг рўйхатдан ўтиш жойи бўйича тегишли ҳудудий ЙҲХДХ органларида автомототранспорт воситаларини рўйхатдан ўтказмасдан ҳисобга қўйилади.
46. Мазкур Низомнинг 45-бандида кўрсатилган ҳужжатларни ҳисобга қўйиш учун нотариус ва консуллар томонидан уларнинг электрон шакллари ҳудудий ЙҲХДХ органларига юборилади ёки ЙҲХДХнинг автомототранспорт воситаларини ҳисобга қўйишни рўйхатдан ўтказиш Ягона автоматлаштирилган тизимига киритилади.
2018 йил 1 январига қадар кўрсатилган ҳужжатларни ҳисобга қўйиш учун ҳудудий ЙҲХДХ органига:
автомототранспорт воситаси эгасининг ёки унинг вакилининг шахсини тасдиқловчи ҳужжати;
автомототранспорт воситасини рўйхатдан ўтказиш тўғрисидаги гувоҳнома;
нотариус томонидан тасдиқланган ҳисобга қўйиладиган ҳужжатнинг иккита нусхаси (ишончнома биттадан ортиқ ишончли шахсга берилган тақдирда, ЙҲХДХ органига ишончли шахслар сони бўйича ишончномалар нусхалари, шунингдек ЙҲХДХ органига битта нусхаси берилади).
47. Мазкур Низомнинг 45-бандида назарда тутилган ҳужжатларни ҳисобга қўйиш ҳисобга қўйиладиган ҳужжатлар ҳақидаги маълумотларни автомототранспорт воситасининг рўйхатдан ўтказиш картасига киритиш йўли билан амалга оширилади, унга ҳужжатнинг электрон шакли илова қилинади.
48. Мазкур Низомнинг 45-бандида кўрсатилган ҳужжатларни рўйхатга қўйиш юк ташувчи автотранспорт воситалари, автобуслар ва микроавтобусларга нисбатан мудофаа ишлари бўйича бўлимни хабардор қилмасдан ЙҲХДХ органи томонидан, кўтариш механизмлари билан жиҳозланган автотранспорт воситаларига (автокран) нисбатан эса «Саноатгеоконтехназорат» давлат инспекцияси томонидан амалга оширилади.
49. Мазкур Низомнинг 45-бандида кўрсатилган ҳужжатларни ҳисобга қўйиш Ўзбекистон Республикаси Вазирлар Маҳкамаси ҳузуридаги Республика йўл жамғармасига йиғимларни ва ЙҲХДХ органларининг рўйхатдан ўтказиш ҳаракатларини амалга оширишдаги хизматлари учун йиғимларни ундирмасдан амалга оширилади.