Audio chin do‘ST

7-SINF
ADABIYOT IV CHORAK 4-DARS
MAVZU: MIRTEMIRNING HAYOTI VA IJODI
Adabiyot olamini yuksak koinotga qiyoslasak, uning bag‘ridagi har bir yulduz ijod olamida gurkirayotgan shoir va yozuvchilardir. Ana shunday porloq yulduzlardan biri adib Mirtemirdir. Mirtemir (Mirtemir Tursunmat o‘g‘li) 1910-yil 10-mayda Turkistonning Eski Iqon qishlog‘ida tavallud topgan. Boshlang‘ich tahsilni bobosidan olgan ijodkor keyingi ta’limini qishloqdagi no‘g‘ay domla maktabida davom ettiradi. Qishloq maktabidan so‘ng, Mirtemir Toshkentga kelib, Almaiy nomidagi namuna ish maktabi (1920 – 23) va O‘zbek erlar bilim yurtida (1925 – 29) o‘qigan. 1929-yil Samarqandga borib, O‘zbekiston Markaziy ijroiya qo‘mitasi raisi Yo‘ldosh Oxunboboyevning kotibi bo‘lib xizmat qilgan. Oradan ko‘p o‘tmay, Mirtemir tuhmat bilan qamaladi, qamoq muddatini esa Belomorkanal qurilishida o‘taydi.
O‘zbek she’riyati taraqqiyotida alohida o‘rin tutgan shoir, xalq tili bilan aytganda, “she’riyatimiz bobodehqoni” o‘z asarlarida samimiy, sof tuyg‘ular, nozik kechinmalarni sodda va tushunarli tarzda ifodalaydi. “Shu’lalar qo‘ynida”, “Zafar”, ”Bong” va shu kabi she’riy to‘plamlar muallifi bo‘lmish Mirtemir ijodiyoti barcha – 7 yoshdan 70 yoshgacha bo‘lgan hamma kitobsevarlar uchun birdek manzur va yoqimli. O‘z she’rlari orqali vatan madhini dildan kuylagan ijodkor yashab o‘tgan maskanining tuprog‘i-yu tog‘igacha, daryosi-yu qumlog‘igacha ko‘kka ko‘tarib, madh etadi.
Bundan tashqari Mirtemir bir qancha dostonlar muallifi ham sanalib, “Barot” , “Xidir”, “Dilkusho”, “Suv qizi” kabi asarlarda adib oddiy mehnat ahli vakillari timsolini yaratgan. Tarjimonlik sohasida esa qirg‘iz xalq eposi bo‘lmish “Manas”, Pushkinning “Ruslan va Lyudmila”, Shota Rustavelining “Yo‘lbars terisini yopingan pahlavon” kabi tarjimalari bilan bo‘y ko‘rsatgan. 
Berdaq nomidagi Qoraqalpog‘iston Davlat mukofoti laureati, “Buyuk xizmatlari uchun” ordeni sohibi, “O‘zbekiston xalq shoiri” bo‘lmish Mirtemir 1978-yilning 25-yanvarida vafot etadi.