Atamalar izohi: Industrial sivilizatsiya

Atamalar izohi:
Konferensiya (konferentia – bir joyga to‘playman) – davlat yoki partiya, jamoat va olimlar vakillarining muayyan masalani muhokama etish uchun yig‘ilishi.
Pragmatik – pragmatizm tarafdori, falsafiy tizim. Maishiy ma’noda pragmatik – hayotga nisbatan o‘z qarashlari va amallarini foydali natijalarga qarab shakllantiruvchi kishi.
Strategiya – hukumatning ishlab chiqarish, daromad va xarajat, budjet, soliq, kapital kiritish, narx-navo, ijtimoiy himoya borasidagi uzoq muddatli, eng muhim tadbirlari rejasi.
Sanksiya – xalqaro kelishuv va normalarni buzgan bir guruh shaxslar yoki butun boshli davlatga nisbatan qo‘llaniladigan cheklov chorasi. Sanksiya iqtisodiy, harbiy, siyosiy va boshqa turda bo‘lishi mumkin.
Mustahkamlash uchun savol va topshiriqlar
1. Xitoyda fuqarolar urushining boshlanishiga nima sabab bo‘ldi va u qanday yakunlandi?
2. Xitoyda amalga oshirilgan «Katta sakrash» siyosatining mohiyati nimada edi?
3. Madaniy inqilob va uning Xitoy uchun oqibatlari nimalardan iborat bo‘ldi?
4. Xitoyda yangi islohotlarning boshlanishiga qanday sabablar turtki bo‘ldi?
5. XX asrning 80 – 90-yillarida Xitoy tashqi siyosati haqida nimalar bilasiz?
6. Xitoydagi islohotlar XXI asr boshlariga kelib qanday natijalarga olib keldi?
Mustaqil ish
Mavzu matnida ifoda etilgan tarixiy voqelik yuz bergan hududlarni Xitoy xaritasida aks ettirishga harakat qiling.
O‘tkir Hoshimovning «Daftar hoshiyasidagi bitiklar» kitobidan olingan quyidagi qatrani o‘qing va daftaringizga mavzu bilan bog‘lagan holda asoslangan esse yozing: «Urushning yaxshisi bo‘lmaydi. Ammo eng dahshatli urush – fuqarolar urushi. Negaki, u avloddan avlodga «meros» o‘tib, abadiy davom etadi!»


25-MAVZU. 1946 – 1991-YILLARDA HINDISTON VA POKISTON
Ikkinchi jahon urushi tugashi bilan Hindistondagi hind va musulmon diniy jamoalari o‘rtasida kelishmovchiliklar yanada keskinlashdi. Buning ustiga urushdan keyingi oziq-ovqat inqirozi Hindistonni deyarli ocharchilik holatiga olib kelib, ahvolni juda murakkablashtirdi. Bu holat Buyuk Britaniyani tezroq Hindistonni tark etishga majbur qildi.