Ашурхон комилова "СОҒинч ранглари"

КЕТМА ГУЛИМ

Атиргулим ! кетма дедим жоним гулим,

Сенсан дедим юракдаги борим гулим.
Тинглар эдинг аламларим зорим гулим,
Ким тинглайди энди унсиз дардларимни.

Соғинчларим кўзларимда толиб кетди,

Нетай сени дайди сабо олиб кетди.
Яна тақдир, қисматимдан нолиб кетдим,
Ким артади энди кўнглим гардларини.

Кўзларимни йиғлатди ғам саболари,

Қулоғимда жарангларди наволаринг.
Димоғимга хуш ёқарди ифорларинг,
Ким тинглайди энди унсиз дардларингни.

Атиргулим! сўлмасанг бас жоним гулим,

Соғинч билан тоблансин ҳар оним гулим.
Фироқ куйлаб, чалмоқдадир торин гулим,
Капалаклар олиб учсин дардларингни,
Дийдор артсин баргингдаги гардларингни.
☆☆☆☆☆☆

Атиргулга тўлганда боғим,

Бир кун мени йўқлади қалам.
Ёлғизликдан қутулдим чоғи,
Шу қоғозга жойланди нолам.

Дарвозанг ёнида хаёлим,

Кутардим васлингга интизор.
Бир кун тушди сен томон йўлим,
Лек, бўлгандинг бегонага ёр.

Тор кўчангда кенг юрак билан

Қўл силтардим, қўлим титрарди.
Шум янгалар айтганда ўлан,
Бошим узра осмон йиғларди.

Сен бахтлисан!

Бугун шу сўз берганча таскин,
Жаранглайди қалбим тубида.
Лек, сен каби севгисиз одам,
Кўчиб кетди... кўнглим уйидан.
ЯШИРИБ ҚЎЙДИМ
"Фироқ кўзларидан ёш оқса қалқиб"
Абдулла Комил сатри
“Фироқ кўзларидан ёш оқса қалқиб”,
Ҳижрон азобидан энтикар юрак.
Хотира соядек қилмоқда таъқиб,
Мен сени юз йилда унутсам керак.

Дийдор кўзларида қувонч намоён,

Сафаринг қариди соғинч сўқмоғи.
Менинг азобларим ўзингга аён,
Дунёлардан улкан ёрнинг қийноғи.

Бир кун ёр суратинг бердинг қўлимга,

Яширдим ой нури етмаган жойга.
Айғоқчи юлдузлар боқди йўлимга,
Ранжиган боладек лаб бурдим ойга.

Ой булут ортига чекинди шунда,

Мен сени қизғониб кўксимни ўйдим.
Зиёлардан маҳрум қоронғу тунда,
Расмингни қалбимга яшириб қўйдим.