Asbosement buyumlar

Devorbop buyumlar. Asbosement asosida quyidagi devorbop buyumlar tayyorlanadi: to‘lqinsimon listlar, yirik o‘lchamli yassi listlar, ekstruziya usulida olingan plita va panellar, yog‘och hamda asbosement karkas asosidagi tashqi devor panellari. Òo‘lqinsimon listlar isitilmaydigan sanoat binolari devor konstruksiyalarini barpo etishda ishlatiladi. Ular uzunligi, odatda, 2,5 m bo‘ladi va profili bo‘yicha 40/150 va 51/177 (o‘rtacha Yevropa profili) turlarga bo‘linadi.
Yirik o‘lchamli listlar uzunligiga 200–300 mm, eni 1200–1500 mm, qalinligi 4–12 mm asbosement buyumlar kiradi. Ular o‘rtasiga issiqlik izolatsiyasi materiali qo‘yilgan uch qatlamli panellar va pardevor konstruksiyalar tayyorlashda ishlatiladi.
Ektruzion panel va plitalar uzunligi 6 m gacha, eni 750 mm gacha va balandligi 60–180 mm, devorbop konstruksiya va pardevor sifatida ishlatiladi. Ular issiqlik izolatsiyasi materiali (yarim bikr mineral paxta plitalar) bilan birga va bo‘shliqli holda tayyorlanadi (9.10-rasm).
9.10-rasm. Ekstruzion asbosement pardadevor panellar:
a – burchak;
b – o‘tuvchi.


«Djons Menvill» (AQSH) firmasi ishlab chiqarayotgan ekstruzion devorbop panellar buyumning uzoq muddat ishlashini ta’minlaydigan akril polimerlari asosida olingan rangli kompozitsiyalar bilan qoplangan bo‘lib, turarjoy va jamoat binolari qurilishida ishlatiladi.
Òashqi devorbop asbosement panellar yog‘och karkasga uchqatlamli qilib, o‘rtasiga issiqlik izolatsiyasi materiali qo‘yilgan holda ishlab chiqariladi. Ular yig‘ma va monolit usulda quriladigan turarjoy binolari hamda g‘ishtli uylar qurilishida tashqi devor sifatida ishlatiladi (9.11-rasm).
Panellarning uzunligi 2980 va 5980 mm, balandligi 2780 mm va 3280 mm, qalinligi 160 va 210 mm bo‘ladi. Panellar tashqi tomoniga ishlatiladigan listlar yassi va relyefli, kulrang va oq (oq sement asosida) hamda rangli (rangli sement asosida) bezakli bo‘ladi.


9.11-rasm. Devorbop asbosement panel.