Асадуллаев М. М., Асланова С. М. Асаб касалликлари пропедевтикаси

6.7.2. Иккиламчи нейроОИТС
Асаб тизимининг иккиламчи табиатдаги зарарланишига организм умумий иммун тизимининг, шунингдек миянинг автоном иммун тўсиғи функциясининг бирламчи сўниши сабаб бўлади, бунинг оқибатида соғлом одамларда латент даврда бўлган қўшилган инфекциялар фаоллашади. ОИТСда ривожланадиган иммунодепрессия шароитида вирус, бактериал, замбуруғ ва протозой инфекциялар фаоллашади. Буларнинг барчаси ҳаётлик чоғида этиологик ташхислашни қийинлаштиради, шунингдек бирламчи асаб тизимининг иккиламчи зарарланишдан, нейроОИТСдан қиёсий ташхислаш қилишни қийинлаштиради.
6.7.2.1. Цитомегаловирусли инфекция (ЦМВ)
Цитомегалоинфекция ҳаммадан кўп учрайди. У ОИТСда асаб тизими зарарланиши ҳодисасининг 25 % ни ташкил қилади ва ретинит билан қўшилган ним ўткир энцефалит ривожланишига олиб келади. Оғир ҳолларда бу кўр бўлиб қолишга олиб келади. Ташхис бош мияни биопсия қилганда осонлашади ва ним ўткир энцефалит сифатида морфологик ўзгаришларни топиш қийин бўлмайди, бунда цитомегал ҳужайраларнинг микроглиал тугунлари типик ядро ичи қўшилмалари билан бирга бўлади. ЦМВ - энцефалитнинг клиник симптоматикаси ОИТВ - энцефалит аломатларига ўхшаш бўлади. КТда қоринчаларнинг кенгайгани, пўстлоқ атрофияси, мия шарларининг оқ моддаси зичлигининг камайган ўчоқлари аниқланади, ЦМВ зўраючи полирадикулоневропатиянинг патологик жараёнга бел ва думғаза илдизларининг тортилиши билан ривожланишига олиб келади. Бу клиник жиҳатдан думғаза соҳасида парестезиялар билан намоён бўлади. Морфологик текширилганда бу илдизларда яллиғланган инфильтратлари, ўчоқли васкулит ва миелин қобиқнинг некрози топилади.
6.7.2.2. Энцефалитлар ва радикулитлар
Оддий герпес вируси энцефалитни ёки радикулитни келтириб чиқариши мумкин. Радикулитнинг вирус келтириб чиқарган типик ҳодисаларда оғриқ ва парестезиялар герпетик тошмалар тошишидан бир неча кун олдин пайдо бўлади. Тошмалар тошган жой одатда тана, юз ёки оёқ-қўллардаги маълум дерматомларга тўғри келади.
Шунингдек, миелорадикулит ва постгерпетик неврит ривожланиши мумкин. ОИТС билан оғриган беморларда асаб тизимининг бактериал инфекциялари жуда кам учрайди. Бу клиник жиҳатдан менингитлар ёки мия абсцесси билан намоён бўлади. Ташхислаш учун серологик текширишлар ва ликворда бактериал флорани аниқлаш учун экиш асос бўлади.