Андижон давлат тиббиёт институти факультатив, госпитал терапия, халқ табобати ва эндокринология кафедраси

ҚАНДСИЗ ДИАБЕТ


Қандсиз диабет (ҚД, Diabetes insipudus ) – антидиуретик гормонининг етишмаслиги (марказий ҚД) ёки буйрак каналчаларининг бу гормонга нисбатан сезувчанлигининг пасайиши натижасида буйракларнинг сийдикни концентрациялаш (буйраклар ҚД) қобилиятининг пасайиши билан кечадиган клиник синдромидир.
Қандсиз диабетнинг патогенетик тамойилларига асосан таснифи:

1. 
   Марказий ( гипоталамо-гипофизар) ҚД.
   

- идиопатик (ҚД нинг 1/3 кисми)
- симптоматик (ҚД нинг 2/3 кисми)
2. Буйраклар қандсиз диабети.
Этиологияси. Марказий ҚД нинг 1/3 кисмида этиологик омил ноаниқдир (идиопатик ҚД). Бундай беморларнинг бир қисмида АДГ ишлаб чиқарувчи хужайраларга нисбатан антителолар борлиги аниқланган. Вольфрам синдромида (DIDMOAD синдроми ,бу инглизчада DI-diabetesinspidus,DM-diabetes mellitus,OA-oculus atrophy,D-defness) қандли диабет, кўрув нервнининг атрофияси, карлик ва сийдик пуфаги атонияси билан бирга кечади. Айтиб ўтилган синдром аутосом - рецессив йул билан наслдан наслга ўтади ва тўла (ҳамма кўринишлари билан ) ёки тўлиқсиз учраши мумкин.
Қандсиз диабет учраши бўйича эндокринопатияларнинг 0,5-0,7% ини ташкил қилиб, кўпрок 20-40 ёшли кишиларда кўпрок учрайди. Касалликнинг туғма турлари чақалоқлар ҳаётининг биринчи ойларидаёқ ёки анча кейин ҳам ривожланиши мумкин. DIDMOAD синдроми кўпрок ёш болаларда учрайди, аммо пубертат ёшлиларда ёки 20-50 ёшлиларда ҳам учраши мумкин.
Марказий ҚДнинг 2/3 қисми касалликнинг симптоматик тури сифатида учрайди.
Қандсиз диабет ўткир ва сурункали касалликлар натижасида: грипп, менингоэнцефалит, ангина, скарлатина, кўкйутал, терлама турларида, септик холатлар,туберкулёз, сифилис, безгак, ревматизмдан сўнг ,бош мия жарохати электр токи билан шикастланиши, гипоталамо-гипофизар сохасига қон қуйилишлар натижасида ривожланади.Касаллик болаларда туғруқ вактидаги травма натижасида ривожланади. Гипоталамо-гипофизар сохаси ўсмалари аденомалар,тератомалар, глиома ва краниофарингиома натижасида ривожланади .Гипофизга сут бези, бронхлар ва қалқонсимон безлари ўсмалари метастаз беради. Лейкоз, эритромиелоз, лимфогранулематоз ва бошка касалликдарда гипоталамус ва гипофизнинг инфильтрацияланиши қандсиз диабет ривожланишига сабаб бўлиши мумкин.
Қандсиз диабет тарқалган ксантаматозда (Хенд-Шюллер - Кристен касаллигида) учраб, «изоляцияланган» гипофиз синдромида учрайди. Қандсиз диабет билан хасталанганларни 5 дан бир кисми нейрожаррохликлар туфайли ривожланади.