Amaliy mashg’ulot №1 Mavzu. Suyaklarning shakllarini o’rganish. Nazariy tushuncha

Amaliy mashg’ulot №1
Mavzu. Suyaklarning shakllarini o’rganish.

Nazariy tushuncha. Suyaklar shakli va vazifasi ko`ra 4 guruhga ajratiladi.

I. Naysimon suyaklar: uzun va kalta guruhlarga ajratiladi. Ular naysimon shaklga ega bo`lib, tashqi zich, qattiq (kompakt) moddadan va ichidagi g`ovak-simon moddadan tuzilgan. Bu suyaklar tayanch, himoya va harakat vazifasini bajaradi. Uzun naysimon suyaklar: yelka, tirsak, bilak; son, katta boldir, kichik boldir suyaklari. Kalta naysimon suyaklar kaft va barmoq falangalari.

II. G’ovak tuzilishga ega bo`lgan suyaklar: bu suyaklarning ichi g`ovak moddadan iborat bo`lib, tashqi yuzasi yupqa zich (kompakt) modda bilan qoplangan bo`ladi. Uzun g`ovakli suyaklar turkumiga qovurg`a va to`sh suyaklari, kalta g`ovakli suyaklar turkumiga umurtqa, kaft usti suyaklari kiradi.Mushaklar qisqarishini muvofiqlashtiradigan, ularning paylari ichida taraqqiy etadigan sesamasimon suyaklar (tizza qopqog`i suyagi, no`xatsimon suyak va h. k) ham g`ovakli suyaklar guruhini tashkil qiladi.

III. Yassi suyaklar: a) asosan himoya vazifasini bajaradigan kallaning yassi suyaklari. Bu suyaklar biriktiruvchi to`qima holatidan suyaklanib, ichki va tashqi yuzalari zich (kompakt) moddadan tashkil topib, o`rtasida g`ovak modda bo`ladi.

Tog`ay moddalik holatidan suyaklanadigan kurak va chanoq suyaklari ham yassi suyaklar guruhini tashkil etadi.

IV. Aralash suyaklar: bu guruh suyaklar bir necha bo`laklardan taraqqiy etib, qo`shilib ketadi. Aralash suyaklar guruhiga qisman endesmal va qisman enxondral taraqqiy etadigan o`mrov suyagini ham kiritish mumkun.

Naysimon suyaklarning tayanch vazifasini bajaruvchi tana qismiga diafiz deyiladi. Diafizlarning uchi esa, naysimon suyaklarning bo`yin qismiga to`g`ri keladi va bu sohalarni metafiz deyiladi. Naysimon suyaklarning bo`g`im hosil qiluvchi uchlariga epifiz qismi deyiladi. Suyaklardagi mushaklar birlashadigan o`simtalariga apofizlar deb ataladi.

Suyaklarning morfologik birligini osteonlar tashkil etadi. Osteonlar suyak ichida qon tomir va nerv tolalari yo`naladigan kanallar (bo`shliqlar) atrofida joylashadigan suyak to`qimalaridan hosil bo`ladi. Osteonlar naysimon suyaklarda uning uzunligi bo`ylab, yassi suyaklarda esa ularning yuzasi bo`ylab yo`na-ladi.Suyakning organik moddasi ossein deb ataladi. Ossein kollagen moddasining bir turi hisoblanadi. Ossein va anorganik modda qo`shilishidan suyaklar mus-tahkam, qattiq va elastik bo’ladi.

Darsning maqsadi: Suyaklarning naysimon bo`lishi va naysimon suyaklarning ahamiyati haqida ma’lumot berish.

Kerakli jihozlar: ikki varaq qog`oz (20x30 sm), osma apteka tarozi pallasi, nina yo`g`onligidagi sim bo`lagi (20-25 sm), diametri 1 sm li shisha nay yoki o`quvchi ruchkasi, ip yoki ipak lenta bir-biridan 20 sm oraliq tik o`rnatilgan ustunchali taxtacha, qog`oz yelim.

Ishning borishi: Ikki varaq qog`ozning biri shisha nayga yoki ruchkaga, ikkinchisi to`g`ri simga uzun tomonlari bilan zich qilib, uzmasdan o`raladi; varaqlarning eng chekka qismi yelim bilan o`ralgan qismga yopishtiriladi. yelimlangan joy qurigach, shisha nay va sim o`ramlardan sug`irib olinadi. Natijada suyak tuzilishini eslatadigan qog`oz nay va ichi yaxlit qog`oz tayoqcha hosil bo`ladi. Shundan keyin qog`oz tayoqchaga bittadan lenta halqa kiritiladi. Ustunchalar ilgichiga avval qog`oz tayoqcha o`raladi va undagi lentali halqachaga tarozi pallasi ilinadi. Tarozi pallasiga to qog`oz tayoqcha egilguncha tosh qo`yib boriladi va tayoqchaning qancha og`irlikda yuk ko`tara olishi belgilanadi. Natijalar taqqoslanganda jiddiy farq ko`zga tashlanadi: garchi bir xil materialdan yasalgan bo`lishiga qaramay, nay yaxlit tayoqchaga nisbatan ancha og`irroq yuk ko`tara olishini ko`rsatadi. Tajriba nayining shu materialdan yasalgan tayoqchaga nisbatan mustahkam bo`lishini, binobarin skelet ayrim suyaklarining naysimon bo`lishi organizmga mustahkamlik va yengillik berishini isbotlaydi.







1 rasm. Odam skeletining tuzilishi ( old va orqa tomondan ko`rinishi) . 1- kalla suyagi; 2 -ko`krak qafasi; 3 - qo`l suyagi; 4 -umurtqa pog’onasi; 5- tos suyagi; 6 -oyoq suyagi.


Ishni rasmiylashtirishga doir tafsiyalar:

Amaliy mashg`ulot darsi davomida: 1.Odam skeletining umumiy ko’rinishini chizing va qismlarini belgilang. 2. Naysimon suyakning tuzilishini chizing va qismlarini belgilang.

Darsni mustahkamlash uchun savollar

1. Skelet suyaklarining vazifasi.

2. Naysimon suyaklarning tuzilishi.

3. Suyaklarning morfologik birligi va uning vazifasi.

4. Odam skeletining joylashishiga ko`ra

suyaklar turlari.

5. Suyaklarning shakliga ko`ra turlari.