Allayarov A. I. O’rmonov H. B. O‘zbekistondagi ziyoratgoh obidalar

NAMANGAN VILOYATIDAGI ZIYORATGOHLAR

Xoʻja Amin maqbarasi. Xoʻjamning qabri — Namangandagi meʼmoriy yodgorlik (XVIII asr). Shayx Xovandi Tohur avlodlaridan boʻlgan, Toshkentdan Namanganga kelib oʻrnashib qolgan Iminxoʻja Eshon qaynotasi Ibrohimxoʻja qabrining old tarafiga, pishiq gʻishtdan qabrdan janubroqda maqbara qurdirgan.

Xoʻja amin maqbarasi

Maqbara XI—XII asrlar meʼmorligi anʼanalari asosida qurilgan boʻlib, gʻishtlar orasi ganch qorishmasi bilan toʻldirib tekislangan. Qabr ustiga toʻgʻri toʻrtburchakli sagʻana qoʻyilgan. Maqbara (9×12 m) peshtoq gumbazli; peshtoq va uning ikki yonidagi guldastalari oʻzaro mutanosib hamda oʻyma girih naqshlar bilan nafis bezatilgan; gʻishtga xomligida oʻyma naqshlar ishlanib, soʻng xumdonda qizdirilgan. Peshtogʻining ravogʻi oʻyma bezakli ustunlar - guldastalarga tayangan.

Xonaning ichki gumbazi naqshinkor qovurgʻalar bilan boʻlinib, har bir boʻlagiga turunjlar, gumbaz osti bagʻallariga muqarnasli ravoqlar ishlangan; xona devorining yuqori qismi yozuv qatori bilan gir aylantirib hoshiyalangan. Binoning tashqi bezagida qora va qizil sir, ravoqlarida qizil va yashil sirlangan gʻisht, gumbazida qizil va qora sirkori parchinlardan jozibador naqshlar hosil qilingan.