ҲАЛҚаро иқтисодиётда бутунжаҳон савдо ташкилотининг ўрни ва аҳамияти

Маълумки, Ўзбекистон 1994 йилнинг июн ойида БСТда кузатувчилик мақомини қўлга киритган эди. 1994 йилнинг декабрида эса Ўзбекистон Республикаси ҳукумати томонидан Ўзбекистоннинг БСТга тенг ҳуқуқли аъзоси бўлиб кириши тўғрисида ариза топширилди. 1995 йилнинг январида эса Ўзбекистоннинг БСТга қўшилиши бўйича махсус ишчи гуруҳи тузилди. Ўзбекистон Республикасининг расмий делегациялари БСТнинг Сингапур (1996), Женева (1998) ва Сиэтл (1999) да бўлиб ўтган вазирлар даражасидаги конференцияларда иштирок этдилар. 1998 йилнинг сентябр ойида Ўзбекистон ҳукумати БСТ Котибиятига республиканинг ташқи савдо режими тўғрисидаги Меморандумини тақдим этди ва унинг расмий тақдимоти бўлиб ўтди. Ушбу юзасидан Австралия, Европа иттифоқи, Янги зелендия ва АҚШ ҳукуматларининг саволномалари олинди ва шунга мувофиқ БСТ Котибиятига жавоблар тайинланди

2002 йилнинг 17 июлида эса Швейцариянинг Женева шаҳрида Ўзбекистоннинг БСТга аъзо бўлиб кириши бўйича мажлиси бўлиб ўтди. Бунда Ўзбекистон Республикасининг ташқи савдо режими тўғрисидаги Меморандумининг янги таҳрири кўриб чиқилди. Мазкур мажлис натижалари бўйича бир қатор мамлакатлар томонидан Меморандум бўйича ёзма шарх ва саволномалар такдим этилди. Ўзбекистоннинг БСТга аъзо бўлиб кириши бўйича ишчи гуруҳининг биринчи мажлиси давомида келиб тушган саволномаларининг таҳлили шуни кўрсатадики, республикамизга қўйилган асосий талаблар аъзоликка давогар мамлакатлар қўйилган умумий талабларга тўлиқ мос келади.

БСТ билан самарали фаолият ташкил қилиш мақсадида, мамлакатда БСТ билан ишлаш бўйича идоралараро комиссия тузилди ва Ўзбекистон Республикаси Вазирлар Маҳкамасининг 1998 йил 14 декабридаги 520-сонли Қарорига мувофиқ унинг таркиби тасдиқланди. Унга ТИАА, Иқтисодиёт Вазирлиги, Молия вазирлиги, Давлат солиқ қумитаси ва бошқа вазирлик ҳамда идоралардан вакиллар киритилдилар. БСТ билан ишлаш бўйича идоралараро комиссия котибияти вазифасини бажариш ТИАА зиммасига юклатилди. БСТга кириш учун зарур бўладиган маълумотларни тайёрлаш мақсадида республиканинг вазирликлар ва идораларида ишчи гуруҳлар ташкил этилди.