Agrokimyo kirish

Marganes (Mn). Yetarli miqdorda marganesning bo’lishini talab etuvchi o’simliklar jumlasiga donli ekinlar, dukkakli don ekinlari, qand lavlagi, ildizmevalilar, kartoshka va mevali daraxtlar kiradi. Har xil ekinlarning hosili bilan har gektar yerdan 1000—4500 g gacha marganes olib chiqib ketilishi mumkin. O’simliklarda marganesning umumiy miqdori o’rtacha 0,001% ga yoki 1 kg og’irlik hisobiga 1 mg ga to’g’ri keladi. Uning asosiy miqdori barglar va xloroplastlarda to’planadi.

Marganes shakar va xlorofil miqdorining oshishida, uning oqsil bilan bog’lanishining mustahkamligini ta’minlashda, shakarlarning harakatini yaxshilashda, nafas olish jadalligini kuchaytirishda ishtirok etadi. Marganes yana askorbin kislota sintezida ishtirok etuvchi fermentlar tarkibiga kiradi.

Shunday ma’lumotlar borki, marganes fosforning qari pastki barglardan ustki yosh barglarga harakatini kuchaytirisliga ijobiy ta’sir etadi. Marganes to’qimalarning suvni ushlab qolish qobiliyatini oshiradi, transsperatsiyani kamaytiradi, o’simliklarning hosil tugishiga ko’maklashadi. Marganesning o’ta tanqisligida rediska, karam, pomidor, no’xat va boshqa ekinlarning hosil tugishi umuman to’xtab qolishi kuzatilgan. Barglarning oqarishi va sarg’ayishi, dog’larning paydo bo’lishi, dukkakli ekinlar bargining yoppasiga xlorozga chalinishi, bodring barg plastinkasining buralib qolishi-marganes tanqisligining asosiy belgilaridan hisoblanadi. Marganes o’simliklarning rivojlanishini tezlashtiradi. Marganes tanqisligida xlorozlar, g’allasimonlarning kulrang dog’liligi, qand lavlagining sariq dog’liligi kuzatiladi.