Agar fanga oid terminlar noaniq bo‘lsa, fanning o‘zi noaniqdir

Ion almashinish reaksiyalari yoki reaksiyalarning ionli tenglamalari
Eritmalarda boradigan barcha reaksiyalar ionlar orasida sodir bo‘ladi. Ionlarga ajralmaydigan moddalar eritmada reaksiyaga kirishmaydi. Ionlar orasidagi reaksiyalarning tenglamalari ionli tenglamalar deyiladi. Reaksiyaga kirishayotgan va reaksiya natijasida hosil bo‘lgan moddalar orasida noelektrolitlar va kuchsiz elektrolitlar bo‘lsa ularni ionlarga ajratib bo‘lmaydi, ya’ni ionli tenglama yozganda bunday moddalar molekulyar ko‘rinishda yoziladi. Reaksiya natijasida hosil bo‘lgan cho‘kma (suvda erimaydigan modda) yoniga ↓ belgisi qo‘yiladi, agar gaz modda hosil bo‘lsa uning yoniga ↑ belgisi qo‘yiladi. Ion almashinish reaksiyalar tenglamalari uch ko‘rinishga ega:

1) Molekulyar reaksiya tenglamasi: KCl + AgNO₃ = KNO₃ + AgCl↓

2) To‘liq ionli reaksiya tenglamasi: K⁺ + Cl^– + Ag⁺ + NO₃^– = K⁺ + NO₃^– + AgCl↓

3) Qisqartirilgan ionli reaksiya tenglamasi: Cl^– + Ag⁺ = AgCl↓

Eritmada ion holida birga bo‘lolmaydigan ionlar yo suvda erimaydigan (ionlarga ajralmaydigan) birikma hosil qiladi yo gaz va kuchsiz modda hosil qiladi. Moddalarning suvdagi holatini eruvchanlik jadvalidan bilish mumkin.