A qodiriy nomidagi jizzax davlat pedagogika instituti tarix fakulteti

Xalqaro valyuta Fondi-1944 yil Bretton-Vuds (AQSH)da o‘tkazilgan Xalqaro konferensiyada tashkil etilgan. BMTning ixtisoslashtirilgan tashkiloti statusiga ega. Qarorgohi Vashington shahrida joylashgan. Uning asosiy maqsadi a’zo davlatlar valyuta-moliyaviy siyosatini muvofiqlashtirish, a’zo davlatlar valyuta kursini, to‘lov balansini qo‘llab-quvvatlash, ularga qisqa muddatli va o‘rta muddatli qarzlar berish kabilardan iborat.
1991 yilga kelib unga a’zo mamlakatlar soni 153 ta bo‘lib, kapitali 120 mlrd. dollarni tashkil etgan.
O‘zbekiston ushbu tashkilotga 1992 yil 21 oktyabrda a’zo bo‘lgan.
Xalqaro tiklanish va taraqqiyot banki-1944 yil Bretton-Vuds (AQSH)da o‘tkazilgan Xalqaro moliya-valyuta konferensiyasida tashkil etilgan. BMTning ixtisoslashtirilgan tashkiloti statusiga ega. SHtab-kvartirasi Vashington shahrida joylashgan. Asosiy maqsadi o‘ziga a’zo bo‘lgan davlatlar iqtisodiyotini tiklash va rivojlantirishga yordam berish, chet el xususiy sarmoyadorlarini qo‘llab-quvvatlash va sanoatni rivojlantirish uchun qarzlar berishdan iborat.
O‘zbekiston ushbu tashkilotga 1992 yil 21 oktyabrda a’zo bo‘lgan.
Xalqaro Qizil Xoch va Qizil yarim oy Harakati-urush oqibatida yarador bo‘lganlarga, harbiy asirlarga, shuningdek, tabiiy ofatlar va boshqa sabablar bilan kasal bo‘lib chorasiz qolgan kishilarga beg‘araz yordam berish maqsadida tuzilgan milliy va xalqaro tashkilotlar birlashmasi. Bu harakatga 1863 yil SHveysariyada asos solingan. SHuning uchun tashkilotning ramzi sifatida qizil xoch SHveysariya davlat bayrog‘idan olingan. Musulmon mamlakatlarida esa tashkilot musulmonchilik ramzi bo‘lgan qizil yarim oy tasviri tushirilgan bayroq ostida faoliyat yuritadi. Tashkilotning raxbar organlari Jenevada joylashgan.
Xalqaro Qizil Xoch va Qizil yarim oy harakatining asosiy tamoyillariga quyidagilar kiradi: insoniylik, holislik, qo‘shilmaslik, mustaqillik, ixtiyoriylik, birdamlik, universallik.
O‘zbekiston ushbu harakatga 1993 yil 21 yanvarda a’zo bo‘lgan.