A qodiriy nomidagi jizzax davlat pedagogika instituti tarix fakulteti

Sayid ota ziyoratgohi. A.Artiqov qishloq fuqarolar yig'inida joylashgan. Zangi otaning to'rt xalifalaridan biri. Mahalla va jome' masjid ham uning nomi bilan yuritiladi. 1998-99 yillarda maqbara qayta ta'mirlangan.Sayid ota Turkiston avliyolarining ulug'laridan bo'lib, ismlari Ahmad. Biroq u kishi xalq orasida Sayid ota nomi bilan shuhrat qozongan. Nasabi Buxoroyi sharifning sayyidlaridan. “Samaratul-mashoyix” kitobida uning shajarasi quyidagicha keltiriladi: Sayid ota alayhir rohma Abu Bakr Rizo ibn Husayn ibn Said Qosim ibn Said Muso Taqiy ibn Said Abdulloh ibn Ja'far Jahhod ibn Said Abdulhaq ibn Said Muhammad ibn Said Ibrohim Rizo ibn imom Muso Kozim ibn imom Ja'far Sodiq ibn imom Muhammad Boqir ibn imom Zaynul Obidin ibn Amiril mu'minin Husayn ibn Aliyyil Murtazo karramallohu vajhahu rizvanullohi alayhim ajmain. Sayid otaning tug'ilgan yili aniq emas. Manbalarda 702/1323 yil vafot etganliklari haqida aytiladi. Sayid ota bolaligidanoq ilm tahsil eta boshlagan. Buxoro madrasalarida zamonasining ulug' mudarrislaridan ilm o'qigan. Aqliy va naqliy bilimlarda yuksak darajaga erishgan. Madrasada talaba ekan ilm, amal va ixlosda sobit bo'lmoq va komil imonga musharraf bo'lish ishtiyoqida uch nafar birodari bilan bir piri komilni topib etagini tutishga qaror qiladilar. Xullas Sayid Ahmad do'stlari bilan birga tariqat ustozini izlab yo'lga tushadilar. Toshkent yaqinida yashaydigan Zangiotaning ularga ustozlik qila olishi mumkinligi haqida eshitib, uning huzuriga shoshiladilar. Zangi ota chorvalarini boqib, cho'ponlik bilan kun o'tkazib yurardi. Talabalar rangi qop-qora bo'lgan bu ulug' zotni ayni paytda bir butazordan o'tin terib, yig'ib yurgan bir holatda topib uchrashdilar. Salom-alikdan keyin ular Buxorodagi madrasalarning birida zohiriy ilmlardan tahsil olayotganliklari, ammo botiniy bilimga ega bo'lish uchun bir muborak zotni izlayotganliklarini aytadilar. Shunda Zangi ota: “To'xtanglar, sizlarni shogird etadigan bir zotni qaerdan topish mumkinligini aytaman”, deydi. Bu ko'ngli toza navqirondan xursand bo'lishadi. Shundan so'ng Zangi ota “Bu ishda nasibangiz bizdan boshqasida emasa ekan”, deydi. Bu to'rt yigit Zangiotaning keyinchalik mashhur to'rt xalifasi bo'lib etishadigan Uzun Hasan ota, Sayid Ahmad ota, Sadriddin Muhammad ota, Badriddin Muhammad otalar edi.