A qodiriy nomidagi jizzax davlat pedagogika instituti pedagogika va psixologiya fakulteti

2-AMALIY MASHG’ULOT: PEDAGOGLIK KASBINING JAMIYATDAGI O’RNI.

REJA:

1. 
   O’qituvchi haqida tushuncha.
   
2. 
   O’qituvchi shaxsiga qo’yiladigan talablar
   
3. 
   Demokratik jamiyatda pedagoglik kasbi
   
4. 
   O’qituvchilik kasbining bugungi kundagi ahamiyati va roli.
   

Maqsadi: Pedagoglik kasbining jamiyatdagi o’rni mavzusi yuzasidan egallangan nazariy ma`lumotlarni tahlil qilish orqali talabalarning bilimlarini chuqurlashtirish, mavzu rejalarini tizimli bayon qilish va ularning amaliy ahamiyatini yoritib berish orqali talabalar kasbiy bilimlarini kengaytirish.
O’zbekistonda uzluksiz ta’lim tizimining isloh qilinishi, ya’ni ta’lim standartlari asosida ta’lim va tarbiya jarayonini qayta tashkil etishga kirishilgan hozirgi kunda o’qituvchi faoliyatiga uning pedagogik mahoratiga alohida e’tibor berilmoqda.

Mamlakatimizda yangi tahrirda qabul qilingan “Ta’lim to’g’risida”gi qonuni ko’p jihatdan ta’lim sifatini oshirishga, o’qituvchi faoliyatiga, uning kasbiy nufuzini oshirishga bog’liqdir. Shunday ekan, sog’lom, har tomonlama barkamol avlodni yеtishtirish uzluksiz ta’lim tizimida mehnat qilayotgan pedagogning saviyasiga, tayyorgarligiga va fidoyiligiga, yosh avlodni o’qitish va tarbiyalash ishiga bo’lgan munosabatiga bog’liqdir. O’qituvchi jamiyatning ijtimoiy topshirig’ini bajaradi. Shunday ekan, har tomonlama yеtuk mutaxassislarni tayyorlashda o’qituvchi muayyan ijtimoiy-siyosiy, pedagogik talablarga javob berishi lozim. O’qituvchi mustaqillik g’oyasiga e’tiqodli, har tomonlama rivojlangan, ilmiy tafakkuri, kasbiga tegishli ma’lumoti bor ya’ni o’z fanining chuqur bilimdoni, pedagogik muloqot ustasi, pedagogik-psixologik va uslubiy bilim va malakalarni egallagan bo’lishi hamda turli pedagogik vaziyatlarni tezda aniqlay bilishi, o’rganishi va baholay olishi zarur.