9-синф инглиз тили дарсликларидаги матнлар орқали гапиришни ўргатиш Мавзунинг долзарблиги

Тадқиқотнинг амалий аҳамияти. Республикамиздаги ўрта умумтаълим мактабларида 9-синф ўқувчиларининг гапириш нутқини ривожлантириш, сўз бойлигини шакллантириш ва ўз шахсий фикр мулоҳазаларини инглизча баён қила олиш қобилиятини ривожлантиришга хизмат қиладиган амалий- ижодий усуллар, илмий-назарий тавсиялар баён қилинади. Инглизча матнлар асосида гапиришни ўргатишда аслиятдаги ва муаллифлар томонидан тузилган матнларни назарий жиҳатдан таҳлил қилиш билан бирга амалий топшириқлар, матндан олдин ва матндан кейин бажариладиган машқлар, оғзаки савол- жавоблар кенг кўламда қўлланилади. Улардан инглиз тили дарсларида ўринли фойдаланиш техналогияси ишлаб чиқилади.
Тадқиқотнинг илмий янгилиги ва назарий қиймати
9-синфларда инглизча матнлар асосида гапиришни ўргатиш илмий- назарий аҳамияти ўтказилган тажрибалар натижалари бўйича асосланади, уларда ўқувчиларнинг оғзаки нутқининг ҳозирги кундаги ҳолати таҳлил қилинди, гапиришни ўргатишнинг самарали усуллари аниқланди, ҳамда ўқувчилар нутқида учрайдиган анъанавий нуқсонларни олдини олиш методикаси ишлаб чиқилди; машқ ва топшириқлар изоҳланди; методик ишланмалар тажриба шароитида синовдан ўтказилди.
Тадқиқотнинг назарий-қидирув босқичида ушбу диссертация мавзуси билан боғлиқ илмий адабиётлар, методик қўлланмалар ўрганилди ва таҳлил қилинди. Юқори синф ўқувчиларининг оғзаки нутқи, билим даражаси ўрта умумтаълим мактабларида ўрганилди, илмий тадқиқотни мақсади, илмий методик усуллари белгилаб олинди.
Тажриба босқичида 9- синф ўқувчиларининг оғзаки нутқини ўстириш, уларга пухта билим бериш; мустақил фикрлаш, матн устида ишлаш кўникма ва малакаларини шакллантириш учун зарур бўладиган илмий текшириш методлари аниқланди, 9-синф ўқувчилари учун мўлжалланган инглиз тили дарслигида матнлар ҳамда матндан олдин ва матндан кейин бажариладиган машқлар методик жиҳатдан таҳлил қилинди, тадқиқотнинг мақсад ва вазифалари юзасидан тажриба-синов ишлари ўтказилди.
Тажрибавий-умумлаштирувчи босқичда инглизча матнлар асосида гапиришни ўргатишда замонавий методик усулларининг самарадорлик даражаси аниқланди; кутилган ҳамда эришилган ижобий натижалар таҳлил қилинди, улар олдинги натижалар билан таққосланди ва умумлаштирилди; олинган натижаларга қараб илмий хулосалар чиқарилди.