9-синф инглиз тили дарсликларидаги матнлар орқали гапиришни ўргатиш Мавзунинг долзарблиги

9-синф инглиз тили дарсликларидаги матнлар орқали гапиришни ўргатиш
Мавзунинг долзарблиги. Мустақиллик йилларида таълим тарбия жараёнининг самарадорлигини ошириш жаҳон стандартига жавоб берадиган юқори малакали мутахассисларни тайёрлаш устувор вазифа сифатида ҳаётимиз кун тартибига қўйилмоқда. Республикамизда узлуксиз таълимни амалга ошириш бўйича кўпгина қонун ва дастурлар қабул қилинди ва улар собитқадамлик билан ҳаётга татбиқ этилмокда.
Дунё ҳамжамиятида иқтисодий, маданий, илмий-техникавий соҳалардаги янгиликлар ва хорижий мамлакатлар билан ўрнатилаётган дўстона муносабатлар хорижий тилларни ўрганишни тақозо этмоқда. Ёш авлодга она тилини пухта ўрганган ҳолда яна бирорта чет тилни чуқур ўргатиш, бу тилда бемалол мулоқот қила олиш кўникма ва малакаларини ҳосил қилиш, бу соҳада етук мутахассисларни тайёрлаш ҳозирги кунда долзарб мавзу бўлиб келмоқда.
Инглиз тилини ўргатишдан асосий мақсад инглиз тилида бемалол мулоқот қила олиш, инглизча матнларни тушуна билишдан иборатдир. Шу сабабли ўрта умумтаълим мактабларида инглиз тили дарсликларида нутқий фаолият турлари (гапириш, тинглаб тушуниш, ўқиш, ёзиш) дан бири бўлмиш гапиришни ўргатишга кўпроқ эътибор берилиши лозим. Ўқитувчи инглиз тилида гапиришни ўргатишда турли воситалардан фойдаланади. Ўрта умумтаълим мактабларининг юқори синфларида инглизча матнлар асосида гапиришни ўргатиш анча самарали усул ҳисобланади. Аммо инглизча матнлар асосида гапиришни ўргатиш чуқур ўрганилмаган масалалардан биридир.
Инглиз тилида гапиришни ўргатишда инглизча матнлардан фойдаланиш бўйича илмий-тадқиқот ишларини олиб бориш, қўлга киритилган натижаларни оммалаштириш зарурати ушбу тадқиқот ишини амалга оширишга сабаб бўлди.
Ўрта умумтаълим мактабларининг 9-синфларида инглизча матнлар асосида гапиришни ўргатиш усулларини ишлаб чиқиш ҳамда уларни амалда қўллай олиш бўйича методик тавсиялар бериш тадқиқотнинг мақсадини ташкил этади.
Тадқиқотнинг объекти ўрта умумтаълим мактабларининг 9-синфларида гапиришни ўргатиш.